Sungasong sa bagyong Duterte
Unsay arang ni Presidente Rodrigo Duterte? Ang iyang popularidad, ang mas popular niyang gubat batok sa ilegal nga drugas ug ang paglambo sa nasudnong ekonomiya nga gipasidunggan nga maoy labing paspas sa tibuok Asya makasagang sa tanang pagsaway sa iyang pamunoan:
Bisan kapin na sa 4,000 ka kinabuhi ang nakalas sa gidudahang mga durugista, nga ang pipila gidudahan nga gilaktod sa pagpatay, ang kinabag-an sa katawhan niabiba. Gidayeg pa gud nila ang pamunoang Duterte sa pagpatigbabaw sa tawhanong katungod. Ug ang paglambo sa ekonomiya nga mas paspas kay sa China ug ubang kanasuran sa Asya mopahilom sa kabalaka nga drugas ray gitutokan ni Duterte ug nataligam-an ang panginabuhi sa katawhan.
* * *
Wa magkinahanglan si Duterte og martial law, ni pagsuspenso sa writ of habeas corpus sa pagpatuman sa iyang mga plano. Makasandig si Duterte sa iyang talagsaong popularidad aron nga molingiw lang ang katawhan sa kalit ug tago nga paglubong sa patay’ng lawas sa diktador sa Libingan ng mga Bayani ginamit ang kahimanan sa gobiyerno.
Makahimo siya pagdupa sa operasyon sa kapolisan sud sa prisohan bisan klarong gitumong pagpatay ug pagpahilom ni Albuera Mayor Rolando Espinosa Sr. kay nituo ang katawhan sa iyang pasalig nga nahibawo siya sa iyang gihimo ug nga ang pagpanglaktod sa balaod gikinahanglan pagbaraw sa mga durugista nga niguba sa kinabuhi ug panghunahuna sa minilyon ka Pilipinhon.
* * *
Nahibawo si Duterte nga bisan sa iyang popularidad ug pasiunang kalamposan di siya makabuylo kun may mga lider sa oposisyon nga determinadong mokuwestiyon sa iyang matag lakang. Mao nga ang unang nipiti sa iyang administrasyon mao ang kaparian sa Simbahang Katoliko ug ang mga sakop sa media. Ang nahitabo ni Senador Leila de Lima maoy di malalis niyang pasidaan unsay dangatan ni bisan kinsa nga mangahas ug maghilas-hilas sa pagsaway sa iyang mga programa ug mga pamahayag. Ang kahilom sa kasagaran sa mga alyado ni de Lima nagmatuod nga nirehistro ang pasidaan ni Duterte.
* * *
May tambag ang banggiitang mga politiko sa mga panahon nga ingon ini: Kun dunay bagyo, labi na kun ang direksiyon sa hangin di pabor nimo, hupo. Kay kun motuyhakaw, segurong mabali. Klarong wa maminaw sa tambag si de Lima ug ang mga susama niya.
Apan kun nihupo pa silang Dr. Jose Rizal ug Andres Bonifacio sa bangis nga bagyo sa mga Katsila sa 1800s unsa kahay gidangatan ning nasura? Kun wa motuyhakaw silang Ninoy Aquino ug kaubanan batok sa bagyo sa diktadorang Marcos, unsa kahay gidangatan sa kampanya pagsakmit pagbalik sa nasudnong kagawasan ug demokrasya? Atubangan sa bagyong gilusad ni Duterte batok sa tawhang katungod ug kaligdong, magpabilin ba ‘tang mohupo? O mangahas sa pagtuyhakaw?
* * *
- Latest
