Brgy Tisa, Cebu City

“Puwede ba diay ang kanhi namo kapitan maoy mo-assist sa pagpanghatag sa financial assistance sa mga senior citizens diri sa among barangay? Grabe na man ang pamolitika diri sa among lugar.”

 Brgy Pasil, Cebu City

“Nagpasalamat mi kay nadakpan na ang namaligya’g shabu diri sa compound daplin sapa ug tapad sa kapilya. Pero naa pay nahibilin diri sa Sitio Lawis nga mga sagbot sa katilingban.”

 Brgy Tabon, Dalaguete, Cebu

“Diri sa among lugar wala pa man mahurot ang namaligya’g shabu nga unta naa na may misurender diri, pero balik ra man gihapon sa ilang mga naandan nga bisyo.”

 Brgy Punta Engaño, Lapulapu City

“Ngano man ning mga PUJ diri nga magbiyahean sa highway-Mandaue nga dili na man mosulod paingon sa merkado. Wala man sad ni sila dakpa sa mga enforcers.”

 Brgy Poblacion, Tabogon, Cebu

“Akong hangyo sa maapil sa pagpahigayon sa TUKHANG nga unta klarohon gyud nila kinsay mga tinuod nga nalambigit sa ilegal nga drugas kay daghan man ko nabantayan nga inosente pero gipugos pagpasurender sa mga polis.”

 Brgy South Poblacion, City Of Naga

“Palihug ko’g paabot sa mga polis nga badlungon nila ang dispatcher ilawom sa skywalk kay masuko man kun dili hatagan. Isog kaayo kun ingnon nga isumbong sa polis, moingon man hinoon nga lubagon niya ang liog sa polis.”

 Brgy Mantalongon, Dalaguete, Cebu

“Maayo unta inspeksyonon ning mga tindahan o mga kan-anan diri sa among lugar kay ang ilang mga basura adto man magtapok sa siomayan dapit.”

 Brgy Adlaon, Cebu City

“Diri sa among lugar kay daghan man gihapon ang namaligya’g ilegal nga drugas, wala man gyud sila mahadlok sa gihimong mga tukhang sa mga polis. Maayo unta’g balikan ni sa mga polis ang among lugar aron madakpan ning mga adik diri.”

 Brgy Dumlog, Talisay City

“Nalipay mi kay daghan na kaayong misurender nga drug personalities sa nagkadaiyang dapit sa nasud. Pero diri sa Sitio Baybay daghan man gihapon ang namaligya diri og shabu nga gikan man kuno kini sa Bulacao.”

 Brgy Pajac, Lapu-Lapu City

“Naay mga pusher diri, mga babaye ug lalaki, wala man gyud dakpa sa mga polis nga klaro man kaayo ning ilang pagpamaligya. Among nahibaw-an nga naa kuno ni sila’y protektor nga taga PDEA.”

Brgy Lahug, Cebu City

“Diri kilid sa among gipuy-an sa Sitio Son-oc ang drainage nga gitrabaho wala pa gyud mahuman, igo ra gisugdan. Maayo unta humanon ni kay daghang mapundo nga tubig ug kuyaw kaayo sa dengue, labi na sa mga bata.”

Alang sa inyong mga reklamo text lang sa 09326425494