Traysikol drayber gipatay sa riding-in-tandem

CEBU, Philippines - Traysikol drayber, gipusil patay sa duha ka wala mailhing mga lalaki nga nagsakay og motorsiklo sa may dalan Basubas, atubangan nga bahin sa Tipolo Elementary School sa Barangay Tipolo, Dakbayan sa Mandaue, pasado alas 10 kagahapon sa buntag.

Giila ni PO3 Arthur Cuyos sa Presinto 3 sa Mandaue City Police Office ang biktima nga si Eddie Monus, 53 anyos, nagpuyo sa maong dapit.

Giingong samtang namasahero ang biktima, nihiyos ang ligid sa iyang traysikol hinungdan nga siya nihunong ug gisusi  ang ligid.

Samtang gitan-aw sa biktima ang ligid sa iyang traysikol, adunay nihunong nga itom nga motorsiklo sa iyang tungod ug ang backrider maoy nipusil sa luyong bahin sa ulo sa biktima nga maoy nakaingon sa hinanaling kamatayon niini.

Human namusil, dali usab nga nipabulhot pahilayo sa dapit ang riding-in-tandem ug wala na kini maabti sa mga polis nga nitubag sa alarma.

Gipahibawo ni PO3 Cuyos nga wala malakip sa ilang listahan sa nalambigit sa ilegal nga drugas ang biktima hinungdan nga nagpadayon karon ang dugang imbestigasyon pagsuta sa hinungdan sa maong pagpamusil sa biktima. (BANAT NEWS)