Report sa City Health kuwang

CEBU, Philippines - Gihangyo sa konseho sa Siyudad sa Sugbo ang City Health Department nga mohatag og laing report kabahin sa kaso sa pneumonia, upper respiratory tract infection ug asthma ilabi na sa Barangay Inayawan diin nahiluna ang landfill.

Matud ni Konsehal Joel Garganera, pangulo sa committee on environment sa konseho, nga ang report sa siyudad niadtong Septiyembre kuwestiyonable tungod kay ang maong data nagsugod lang niadtong 2015.

Gihulagway ni Garganera nga kuwang ang maong report.

Nunot niini nisugyot ang konseho nga sunod data nga ihatag sa CHD kanila kinahanglan nga magsugod sa tuig 2011 aron adunay klarong comparison.

Ang CHD niduso og report niadtong Septiyembre subay sa hangyo ni Mayor Tomas Osmeña aron masayud kun taas ba sa kaso sa pneumonia, upper respiratory tract infection ug asthma ang mga molupyo sa Inayawan.

Kini nunot usab sa findings sa Department of Health-7 nga tungod sa baho sa landfill daling makakuha og mga sakit ang mga residente.

Base sa report sa officer-in-charge sa CHD, Dr. Alma Corpin, nius-os ang maong mga sakit karong tuiga diin adunay 59 ka kaso sa pneumonia sugod sa Enero hangtud Agosto itandi sa 60 sa niaging tuig.

Sa upper respiratory tract infection, 145 karong tuiga itandi sa 427 sa niaging tuig samtang sa asthma 35 sa niaging tuig itandi sa tulo karong tuiga. (BANAT NEWS)