Nasubo apan malaumon

Nia ang mensahe ni Arsobispo Socrates Villegas, presidente sa Catholic Bishops Conference of the Philippines (CBCP), alang sa Piyesta sa Santos nga Rosaryo karong adlawa, Oktubre 7.

Nauwaw ko sa mga nabasa gikan sa langyaw’ng media ug mas nauwaw sa nadunggan sa atong mga lider gikan sa lokal nga media. Nasubo nga ang atong mga mithi paghigugma sa Diyos, isigka tawo ug nasud gipulihan sa mga balikas, pamakak ug pagbinastos. Nahadlok ko nga ang kabataan mogakos ning hiwi nga mga mithi, modala sa kasaypanan sa sunod nga henerasyon ug magngiob ang ugma.

Nagbangotan ko sa mga pagpamatay. Dili na makapahasubo sa mga nagbangotan kay ako kinahanglan sab nga pasaligan nga mo-arang-arang na ang kahimtang ug dili mograbe. Nabalaka, naglibog ug nagsubo. Naghilak ko nga nangaliya. Nalisang sa bag-ong mga butang nga gikataw-an lang sa katawhan.

Nidangop ko sa panultihon: Labing ngitngit, dayong banagbanag. Kinangitngitan dayong busilak sa adlaw! Naigo ta, apan wa magapos; naglibog, apan wa mawad-i og paglaom; gigukod apan wa biyai; nahagba, apan wa maggusbat (2 Cor. 4:8-9)

Karong Oktubre 13, tangkod nga 99 ka tuig ang nilabay, ang Birhen nagpakita sa kataposang higayon sa tulo ka bata sa Fatima. Nakita ang milagro sa adlaw bisan sa mga wa sa Fatima: Nituyok, nipatighug sa kalibotan sa wa pa magliku-liko balik sa iyang nahimutangan.

Ang Mahal nga Birhen niingon ni Lucia: Ako ang Birhen sa Rosaryo. Awhaga sila nga mag-rosaryo matag adlaw. Ang gubat mahuman, ug ang mga sundawo mobalik sa ilang pinuy-anan. “Kinahanglang usbon ang ilang kinabuhi, ug mangayo og pasaylo sa kasal-anan. Ayaw na pasakiti ang Ginoo, kay nasakitan na Siya pag-ayo.”

Unsay atong mahimo? Sa mensahe sa Birhen, ang mga sundawo mamauli ug ang gubat matapos. Makit-an natong paghiuli sa kalinaw, kahapsay, katarung ug pagtahod.

Mangaliya sa 20 ka misteryo sa Rosaryo matag adlaw. Ang rosaryohan labihan kayano nga atong mataligam-an apan labihan kagamhanan nga makausab sa kalibotan.

Motambong sa inadlaw’ng Misa pag-alim sa tanang Pilipinhon gikan sa kasuko ug pangiyugpos. Ang inadlaw’ng Pagpangalawat makaalim sa atong yuta. Ang usa ka Misa nga mahigugmaong gitanyag makausab sa tibuok uniberso. Unsa na kaha sa usa ka nasud!

Mangumpisal kada buwan. Ang Birhen niingon sa Fatima: “Ayaw pasakiti ang Ginoo, kay gisakitan na Siya pag-ayo.” Paghinulsol ug pagsakripisyo. Makigsangka ta sa kalibog ug kasaypanan pinaagi sa gahum sa Rosaryo, Pagpangalawat ug paghinulsol. Ginamit kining tulo ka hinagiban sa Fatima, mabanhaw ang atong yuta.

Akong angkunon gikan sa samarang mga kamot ug kilid sa Ginoo sa Balaanong Kaluoy nga kining mga pagsuway nga atong nahiaguman isip katawhan mao lang ang labing ngitngit nga bahin sa kagabhion. Sa tukmang panahon, sa dili pa mopakita ang adlaw, atong makita ang pagdaog sa Lunsay’ng Kasingkasing sa pagsaulog sa ika-100 ka tuig sa pagpakita sa Fatima sa Mayo 13 sunod tuig  ([email protected])