Amy Pond magpabilin sa prisohan
CEBU, Philippines - Magpabilin sa prisohan ang gisuspetsahan nga high-ranking official sa New People’s Army (NPA) human malutsi og arrest warrant alang sa duha ka kasong pagpatay ug frustrated murder.
Ang RTC Branch 17 nibasura sa petisyon sa habeas corpus nga giduso sa kampo ni Amelia "Amy" Pond human nila gikuwestiyon ang pagkapriso niini.
Una nang gihimakak ni Pond nga dili siya si Adelfa Toledo nga maoy subject sa warrant of arrest nga gipagawas didto Compostela Valley, apan ang mga otoridad niinsister nga si Pond mao si AdelfaToledo base sa mga nakuhang ID gikan niini.
Giingong ang iyang grupo maoy nagpaluyo sa kamatayon sa duha ka barangay kagawad sa Ngan, Compostela Valley nga silang Florencio Guay ug Roberto Kapangpangan niadtong Agosto 7, 2000.
Sa pag-dismiss sa petisyon alang sa habeas corpus, si RTC Branch 17 Judge Marivic Trabajo-Daray niisplikar nga ang pagdakop kang Pond, balido human ang trial court sa ComVal ni-amendar sa warrant diin apil sa mga akusado si Pond, hinungdan sa maong desisyon.
Kaduha nga nauktaba ang pagdungog sa petisyon human pakyas nga nitunga ang Office of the Solicitor General nga ni-representar sa Criminal Investigation and Detection Group (CIDG)-7 nga maoy nakadakop kang Pond niadtong Agosto 19.
Nasayran nga sa inpormasyon nga nakuha sa CIDG, si Toledo maoy Executive Committee Member sa Southern Mindanao Regional Committee sa NPA ug Second Deputy Secretary ug miyembro sa Komiteng Hukom sa Davao Oriental Provincial Committee sa NPA.
Hinuon giklaro sa CIDG nga si Pond wala dakpa isip NPA official apan sa warrant of arrest nga gi-issue sa korte gumikan sa kasong kriminal. (BANAT NEWS)
- Latest
