Protectors ni Sabalones

CEBU, Philippines - Dul-an 20 ka polis ug ahente sa Philippine Drug Enforcement Agency ang gibutyag sa gitumbok nga numero unong druglord sa habagatang bahin sa probinsya sa Sugbo nga giingong nagdawat kaniya og payola.

Kapin sa usa ka buwan na sukad boluntaryong nitahan ang inilang drug personality sa Central Visayas nga si Franz Sabalones ngadto kang Police Director General Ronald “Bato” Dela Rosa nipagawas kini og listahan.

Ang listahan naglangkob sa mga polis ug mga opisyal nga nagranggo og Sr. Supt. paubos ug ahente sa PDEA nga matud pa senemana nga magdawatan og payola gikan kaniya.

Sa report sa UNTV News & Rescue, gipakita ang mga pangalan sa 18 ka police officers nga nagranggo gikan sa Police Officer 1 ngadto sa Police Superintendent ug usa ka PDEA agent.

Gipugngan una sa The FREEMAN ug Banat News ang mga pangalan nga nalakip sa maong drug matrix ni Sabalones.

Si Sabalones igsuon sa kasamtangang bise mayor sa lungsod sa San Fernando nga si Fralz kinsa miadto usab didto sa Camp Crame aron klaruhon nga wala siya malambigit sa illegal nga drugas.

Duha ka kanhi opisyal sa Police Regional Office (PRO)-7 ang nalakip sa drug matrix kinsa gipangbalhin na ngadto sa PRO-9 ug PRO-10.

Sa text message nga nadawat sa The FREEMAN, ang usa sa mga kanhi opisyal sa Central Visayas niingon nga iya unang konsultahon ang iyang abogado bahin niini dihang gikuhaan sa iyang reaksyon.

“That’s too much. I’ll talk to my lawyer pa,” matud pa sa text message.

Matud sa UNTV report, duha ka PO1 ang nalakip sa drug matrix, duha ka PO2 (Police Officer 2), upat ka PO3 (Police Officer 3), duha ka SPO2 (Senior Police Officer 2), usa ka SPO3 (Senior Police Officer 3), duha ka PCINSP (Police Chief Inspector), lima ka PSUPT (Police Superintendent) ug usa ka PDEA team leader. Silang tanan pulos nadestino dinhi sa Central Visayas.

Giingong ang senemana nga payola nga madawat sa gipasanginlang mga polis ug PDEA agent gikan kang Sabalones mokantidad og P507 mil.

Gikataho nga gipatawag na sa Criminal Investigation and Detection Group (CIDG) ang maong mga opisyal nga nalakip sa drug matrix aron patubagon sa maong pasangil.

Si PRO-7 Director Noli Taliño niingon nga wala siya masayod sa maong taho ug wa pa sab siya makakita sa maong TV report.

Kahinumdoman nga si Presidente Rodrigo Duterte mibasa sa mga pangalan sa mga tawong nalambigit sa negosyo sa illegal nga drugas lakip na ilang mga protector nga naa sa gobiyerno gikan sa kapolisan, local officials, mga huwes ug bisan na gani ang inilang mga tawo.

Si Duterte bag-ohay lang mihangyo nga palugwayan pa og unom ka buwan ang kaniadto iyang gisaad nga tulo ngadto sa unom ka buwang tagal aron mapapas ang illegal drug trade ug krimen dinhi sa nasud. Gikan sa report sa The Freeman (BANAT NEWS)