Ihawan sa Talisay mokita og P2M

CEBU, Philippines - Dos milyones pesos matag buwan nga income ang target nga makolekta sa ihawan sa Dakbayan sa Talisay nga gamiton alang sa pagpalambo sa uban pang serbisyo alang sa mga Talisaynon.

Kini human ang mga negosyante og karne sa Dakbayan sa Sugbu diha na nagpaihaw sa ilang mga mananap sa ihawan sa Talisay nga bag-o lang naka-renew sa ilang Double A accreditation.

Si Konsehal Manuel Cabriana, kinsa maoy chairman sa committee on market and slaughterhouse nagkanayon nga sud lang sa 15 ka adlaw nakakuha sila og P361 mil gikan sa nagpaihaw nga taga Siyudad sa Sugbu hinungdan nga ilang gibana-bana nga moabot sa P720 mil ang buwan.

Iyang gibutyag nga kun ipuno kini sa ilang orihinal nga income nga P1.3 milyones hayan moabot gyud ang ilang income matag buwan sa P2 milyones.

Matud pa ni Cabriana nga sa maong kalambuan makabenepisyo ang siyudad tungod kay makahatag man ang dako nga income ug daghan pa unya nga mga proyekto nga mapuslan sa Talisaynon.

Siya nagkanayon nga pwede pa sab sila nga modawat og laing mga magpaihaw og mananap tungod kay dako pa man ang ilang lugar sa ihawan.

Sa nasayran, ang mga negosyante og karne ang niatubang ni Mayor Eduardo Gullas ug nihangyo nga anha sila magpa-ihaw sa ilang hayupan tungod kay sirhan na man ang ihawan sa Siyudad sa Sugbu.

Wala sab nagduha-duha si Mayor Gullas sa pagdawat sa mga negosyante tungod kay kwalipikado man sila nga moihaw ug makabenepisyo usab  ang dakbayan.  (BANAT NEWS)