Tom nangunay og ‘simhot’ sa landfill

CEBU, Philippines - Nangunay gyud sa pagsusi si  Cebu City Mayor Tomas Osmeña sa Inayawan Sanitary Landfill aron pagsuta kung unsa ka baho base sa mga reklamo sa giingong pag-alisngaw sa baho.

Matud sa mayor nga sa iyang pag-adto sa landfill wala gani siya nag- face mask ug iyang gihulagway nga dili sama sa gipamahayag sa uban nga ingon ka baho ang landfill.

Gihulagway ni Osmeña nga “underutilize” ang landfill sanglit ang mga basura anaa lang gipundo sa atubangang bahin ug wala magamit ang likod nga duna pay bakante.

Gipasabot ni Osmeña nga hinay-hinay na nilang gipangitaan og solusyon ang problema sa landfill ug gitataw niini nga ubos sa iyang administrasyon mahunong gyud ang korupsiyon sanglit dili man kini motugot nga gamiton gyud sa siyudad ang pribadong landfill sa Lungsod sa Consolacion ug sa pribadong hauler.

Nasuta nga uban sa mayor si kanhi konsehal Nida Cabrera kinsa usa sa gitahasan sa pag-atiman sa landfill aron pagsuta usab sa sitwasyon sa dapit.

Gipahibawo ni Cabrera nga dili ingon ana ka baho ang ilang nasinati tungod kay epektibo ang ilang gibutang nga kemikal sama sa diorite ug enzymes nga nakatabang aron pagminus sa baho.

Dugang niini nga gitahasan usab sila sa mayor nga lihukon ang rekomendasyon nga gipagawas sa Department of Health ug gimanduan usab ang Cebu City Health Office sa pag-monitor sa mga sakit nga posibleng motumaw sama sa mga hubak, pneumonia ug upper respiratory tract infection.

Subay niini, sigun ni City Health Officer, Dr. Alma Corpin, nga nihimo na sila og monitoring sa mga respiratory diseases subay sab sa direktiba nga ilang nadawat.

Sa Barangay Inayawan nikunhod ang kaso sa pneumonia nga naa na lang sa 59 ka kaso gikan sa buwan sa Abril hangtud na sa Agosto niining tuig itandi sa nilabay nga tuig nga niabot og 79 ka kaso.

Nikunhod sab ang kaso sa hubak gikan sa 17 ka kaso sa niaging tuig ug naa na lang kini sa tulo sa pagkakaron.

Ang mga doktor sa siyudad mopahigayon og outreach morbidity clinic sa Inayawn landfill ka duha sa usa ka buwan ug magpadala usab ang siyudad og mga sanitary inspectors aron maoy mo-monitor sa environmental sanitation sa landfill.  (BANAT NEWS)