Pagtukod sa CCMC gipadayon

CEBU, Philippines - Human sa pila ka buwan nga pagpahunong, gipadayon na ang pag-ugmad sa bag-ong Cebu City Medical Center.

Gipahibawo ni Konsehal Mary Ann Delos Santos, deputy mayor for hospital services, nakakuha na sa mga gikinahanglang permit sa pagpatukod sa tambalanan nga wala nakuha sa administrasyon ni kanhi mayor Michael Rama.

Gipahunong ang konstruksiyon sa tambalanan sa Office of the Building Officials (OBO) tungod sa mga kalapasan nga nakita.

Daan na nga gipahibawo sa konsehal nga samtang temporaryong gipahunong ang konstruksiyon sa CCMC gilihok usab sa kasamtangang administrasyon ang mga kuwang nga mga rekisitos.

“In conclusion, presently its already a dream that is not too far to become a reality now, so with the collaborative passion with Cebu City constituents, the City Council and this administration headed by Mayor Tommy Osmeña, Cebu City Medical Center will rise and prevail,” matud ni Delos Santos.

Giklaro hinoon ni Delos Santos nga wala pay petsa kun kanus-a gyud mahuman ang katukuran sa tambalanan apan tinguha nila nga mahuman kini sunod tuig.

Nasayran nga bisan og gipadayon na ang konstruksiyon wala pa kini  building permit apan gipahibawo sa OBO nga nakatuman na ang kontraktor sa mga gikinahanglan nga mga rekisitos maong sa dili madugay makapagawas na sila og building permit.  (BANAT NEWS)