First aid ipaapil sa kurikulum sa tunghaan
CEBU, Philippines - Ipaapil sa curriculum ang regular emergency response ug first aid trainings sa tanang tinun-an sa Probinsiya sa Sugbo.
Kini ang hangyo sa hunta probinsiyal ngadto sa buhatan sa Department of Education ug Commission on Higher Education sa Rehiyon-7.
Gipasar ang maong hangyo pinaagi sa resolusyon nga giduso nilang Bokal Victoria Corominas-Toribio ug Bokal Alex Binghay.
Gihimug-atan sa resolusyon ang ka importante sa kahibawo sa pagluwas og kinabuhi atol sa emerhensiya ug nagkinahanglan kini og tukma nga pagtudlo.
Ang first aid remedies o emergency medical procedure sama sa cardiopulmonary resuscitation o CPR ug Heimlich maneuver makatabang kini sa pagsalbar og kinabuhi.
Gisanglitanan ni Toribio ang usa ka video nga nikatap sa social media kabahin sa usa ka nalumos diin ang mga nitabang dili kahibawo sa first aid response diin ang biktima gihuho hinuon unya dili mao ang pagpahigayon sa CPR.
Matud ni Toribio nga kinahanglang itudlo diha sa mga eskwelahan ang simpleng kahibawo kabahin sa first aid ngadto sa mga estudyante diin magamit nila kini kung dunay magkinahanglan og tabang. (BANAT NEWS)
- Latest
