Cobras mokulit sa ikasiyam nga daog
CEBU, Philippines - Ang wala pa’y pildeng Southwestern University-Phinma Cobras naglaraw sa ikasiyam nilang sagunson nga daog sa ilang pakigsangka og usab sa University of Cebu Webmasters sa 16th Cebu Schools Athletic Foundation, Inc. men’s basketball tournament karong adlawa diha sa Cebu Coliseum.
Human niiskor og 6-0 sweep sa unang hugna, nagpadayon ang ratsada sa Cobras human giusban og pilde ang defending champion University of San Carlos Warriors (58-54) ug University of San Jose-Recoletos Jaguars (75-65).
Ang mga batos ni coach Raul ‘Yayoy’ Alcoseba nanghinaut nga inaton pa ang nagkadina nilang daog ngadto sa siyam batok sa Webmasters nga ilang gipukan, 72-61 niadtong Agosto 27.
Sa gihapon, saligan sa Cobras ang 6-foot-8 niining Congolese import nga si Quentin Nzuzi uban nilang two-time MVP Mark Jayven Tallo, Bernie Bregondo, Jovannie Luz ug ang eksplosibong rookie nga si Sir Shaquille Imperial ug bag-ong kaplag nga forward nga si Ian Ortega.
Samtang ang Webmasters ni coach Kenneth Kernn Sesante maglaum nilang Garciano Puerto, Filvenson Culango, Joven Tagudin, John Jabello, Justine Dacalos, Joseph Mayol ug Clint Suelto sa tinguha nga paninduton ang ilang 2-4 nga baraha.
Sa main game nga gikatakda sa alas-5:30 sa hapon, ang Warriors mosuway og inat sa ilang 3-4 record sa dihang ilang hamagon ang University of Southern Philippines Foundation Panthers nga kausa pa lamang kadaog sa unom ka duwa.
Sa juniors division, ang 6-1 Sacred Heart School-Ateneo de Cebu Magis Eagles naglaraw nga palig-onon ang ilang kampanya nga makaangkon og awtomatik nga luna sa semis sa ilang pakigbatok sa 3-4 SWU Baby Cobras sa pasiunang duwa sa ala-1 sa hapon, samtang ang Baby Panthers ug Cebu Institute of Technology-University Wildkittens mag-abot sa alas -2:30 sa hapon. (BANAT PALARO)
- Latest
