Nag-bomb joke priso

CEBU, Philippines - Aniay leksyon niadtong mga kusog mangomedya nga dili tanang komedya maayo ilabi na karong panahona nga uso ang terorismo bisan asang suok sa kalibotan apil diri sa Pilipinas.

Igo na lang nga mipatulo sa iyang luha uban sa pagmahay ang usa ka 37-anyos nga inahan human kini gisikop sa dihang nagkomedya kini nga dunay bomba sa iyang bag nga giinspeksyon sa guwardiya sa usa ka uptown mall sa Dakbayan sa Sugbo kagahapon sa buntag.

Ang maong babaye giila nga si Jasmin Sala, taga Upper Tipolo, Dakbayan sa Mandaue.

Sa paghinabi sa Banat News sa babaye kini mitug-an nga magpakuha unta sila og hulagway sa iyang higala alang sa iyang visa paingon sa nasud sa Japan. Matud pa ni Sala nga wala gayod kini nagtuo nga usa ka dakong sala sa balaod ang iyang gihimo sa dihang kini miingon nga duna kini dala nga bomba.

Sa dihang kini gisita sa guwardiya kini miingon nga igo lang kini nagkomedya, apan sa dihang nagpakuha na sila og hulagway gisundan sila sa ubang guwardiya ug giimbitar sa ilang buhatan ug didto gipahibalo sa iyang sayop nga nahimo.

Ang kauban ni Sala nga si Alyas Bing nga nahinabi sab sa Banat News miingon nga iyaha pa gani nga gikasab-an si Jasmin sa dihang nakadungog kini sa iyang pag “bomb joke” kay nahibalo kini nga dili maayo ang iyang    pasi-aw.

“Ako ni siyang gikasab-an kay dili gyud na maayo nang “bomb joke.” Mao to nagpa-picture na siya unya naabot na ang guwardiya,” matud pa sa higala niini.

Si Sala miingon nga dako gayud ang iyang pagmahay sa iyang gihimo ug kini usa ka dakong leksyon nga iyang nakat-onan.

“Joke ra gyud naku ‘to, sorry g’yud kaayo,”saysay pa ni Sala nga mipatulo sa iyang luha kinsa naguol sa duha niya ka mga anak nga nagsakit.

Ang imbestigador sa Investigation and Detective Management Branch (IDMB) sa Cebu City Police , Senior Police Officer 1 Romel Oporto nga nahinabi sa Banat News nagkanayon nga unta mahimo kini nga leksyon sa uban nga tawo ang nahitabo ni Sala.

“Leksyon gyud ni sa uban dili gyud mag-joke ingon ana, labi na karon nga init kaayo na karon kay nahitabo sa Davao, dili ra ba ka makapiyansa ana upon discretion sa judge sa first trial,” pasabot pa ni Oporto.

Gumikan kay hangtod karong adlaw nga Lunes pa ang holiday, adlaw nga Martes pa mapaatubang sa korte si Sala nga kasamtangan una nga gitanggong sa selda sa kapulisan.  (BANAT NEWS)