Siyudad sa Naga siyam ka tuig na

CEBU, Philippines - Gisaulog sa kagamhanan sa Siyudad sa Naga ang ilang ika-siyam ka tuig sa pagkahimong siyudad. Nihatag sa iyang unang State of the  City Address (SONA) si Mayor Kristine Vanessa Chiong sa Enan Chiong Activity Center (ECAC) atol sa kasaulugan.

Gawas sa pagpatuman sa wala nahuman nga proyekto sa iyang amahan nga si kanhi mayor Valdemar Chiong, iyang ipatuman ang pagpausbaw sa allowances sa mga empleyado sa barangay ug mga magtutudlo sa mga pangpublikong tunghaan.

Matud ni Mayor Chiong nga ang pagpausbaw sa allowances sa mga barangay workers maoy usa sa makapadasig sa mga empleyado nga mohimo pa og maayong serbisyo sa ilang isig ka tawo.

Nakita sab ni Chiong ang paghatag og budget sa matag barangay sa paghimo sa ilang kaugalingong proyekto.

Sa iyang bahin, ang edukasyon sab ang angayan nga tutukan ug hatagan og daku nga pundo aron mapahimuslan sa mga kabus nga tinun-an sa pagkuha sa bisan unsa nga kurso pinaagi sa scholarship program.

Nagkanayon ang mayor nga iya sab nga ipatuman ang paspas nga transaksiyon sa mga tawo sa City Hall.

Gipasigarbo ni Chiong ang nahimo sa kapolisan nga pinanguluhan ni Supt. John Clark gumikan sa ilang subsob nga kampanya sa ilegal nga drugas.

Gani sa maong kampanya ang kapolisan sa Dakbayan sa Naga ang nakadawat og pasidungog gikan sa Police Regional Office-7.

Gidapit sab ni Chiong ang matag barangay nga palihukon nila ang ilang Barangay Anti-Illegal Drug Abuse Council (BADAC) aron makatabang sa kampanya batok sa ginadiling drugas. (BANAT NEWS)