Emergency cases libre na sa VSMMC

CEBU, Philippines - Nihangyo sa publiko ang mga kadagkuan sa Vicente Sotto Memorial Medical Center (VSMMC) sa pagsabot sa ilang operasyon ilabi na nga ilang gilusad ang Emergency Cases Free Program kay siguradong musamot og sugwak ang tawo nga modangop sa maong tambalanan.

Matud ni Dr. Gerardo Aquino, ang Chief of Hospital sa VSMMC nga sayod na siyang daan nga kanunay’ng puno sa mga pasyente ang ospital, gumikan sa ilang palisiya nga walay balibaran. Mosamot kadaghan unya ang gustong magpatambal sa VSMMC kay aduna silay kausaban karon sa tanang emergency cases kay himoon kini nilang libre ug mamenosan ang taas nga proseso sa pag-release sa pasyente.

Dugang niini nga human ma-stable ang pasyente nga ubos sa emergency case, adunay social workers nga mosusi kanila ug kun kadtong mga pasyente nga adunay PhilHealth ila nang kabubut-on asa sila mopadulong, samtang ang mga indigent nga pasyente ilang ipa-enroll sa point of care program sa PhilHealth.

Sumala pa ni Aquino nakig-alayon sila sa ubang tambalanan aron ang muabot sa VSMMC kadto na lang emergency cases kay andam man sila mohatag og training sa ubang ospital aron dili na lang ibiyahi ang mga pasyente paingon sa dakbayan sa Sugbo kun simple lang ang mga kaso.

Iyang gipahibawo nga kun masuta sa ilang mga doktor nga dili emergency cases ang mga mangabot nga pasyente, ila kining i-refer sa ilang Out-Patient Department. (BANAT NEWS)