Osmeña giawhag sa pagpasira sa landfill

CEBU, Philippines - Sa regular session sa Cebu City Council kagahapon, nihatag sa iyahang privilege speech si Konsehal Joel Garganera labot sa iyang tinguha sa pagpasira sa Inayawan Sanitary Landfill alang sa dinaliang rehabilitasyon niini human gireklamo sa katawhan ug magpapatigayon kay mialisngaw na ang baho niini.

Matud ni Garganera, dili na angay lalisan ang maong problema kay mismo ang mga tawo na ang nagsulti nga dili na gyud maagwanta ang kabaho sa landfill diin lakip na ang mga negosyante ug mga eskwelahan ang nireklamo.

Dugang sa konsehal nga mismo ang DENR-7 niingon nga daghang nakita nga kalapasan ang landfill ug matud pa sa DOH-7 walay permiso ang subling pagbukas niini.

Ang privilege speech usa sa gikinahanglan subay sa tinguha sa konsehal nga mo-file og Writ of Kalikasan, hinoon wala pay petsa kun kanus-a kini i-file sanglit manguha pa sila og dugang impormasyon nga makasuporta sa maong tumong.

Kun kaniadto gusto sa konsehal ang dinalian nga pasirad-an ang landfill apan human sa diskusyon sa sesyon kagahapon, nahimo na lang kining awhag ngadto kang Mayor Tomas Osmeña alang sa dinaliang rehabilitasyon sa landfill.

Si Konsehal James Cuenco niingon nga samtang ipa-rehab ang landfill angay mangita og laing dumpsite samtang si Konsehal Joy Pesquera giawhag ang City Budget ug Department of Public Service sa pag-submetir sa summary sa budget sa gigasto sa landfill sukad sa tuig 2007.

Si Konsehal Eugenio Gabuya Jr. nitataw nga natubag na ni Mayor Osmeña ang maong problema gani niadtong Domingo nipahigayon kini og meeting nga gitambungan sa mga stakeholders ug aduna nay solusyon nga nakab-ot.

 Gitataw usab ni Konsehal Sisinio Andales nga ang pagpasira sa landfill gihimo sa niaging administrasyon bisan og walay kamanduan gikan sa DENR maong dili ilegal ang pagbukas og balik niini dungan sa pag-ingon nga walay laing kalabayan sa basura.

Si Konsehal Margot Osmeña nipasabot nga gibuksan og balik ang maong landfill tungod sa mga reklamo sa katawhan nga walay labayanan sa ilang mga basura.

Kahinumduman nga si Mayor Osmeña niingon nga kun dili ilabay sa Inayawan ang mga basura adto niya kini ipalabay sa SRP ug tungod sa maong pamahayag gihagit ni Garganera ang mayor nga tinud-on ang maong bahad.

Nunot niini, nagplano si Garganera nga mangayo og intervention sa Office of the President pinaagi ni Presidential Assistant for the Visayas Michael Dino aron tabangan sila sa pakig-negotiate sa tag-iya sa private landfill aron mahatagan ang siyudad og maayong deal. (BANAT NEWS)