Jimenez dunay dakung misyon sa Medellin boxing

CEBU, Philippines - Naglungot-lungot na ang Sugbuanong boksidor nga si Junrel Jimenez sa Chao Sy Stable nga makabangon human sa makapakurat niyang kapildihan sa dihang mobida siya sa Medellin Boxing 2016 karong Biyernes sa gabii didto sa Medellin Recreation Center.

Si Jimenez makigsinukliay og kumo  ni JR Salvador sa Mandaue City sa main event sa maong binakbakay nga gipasiugdahan ni Cebuano sportsman Lorenzo ‘Chao’  Sy ug Big Yellow Promotions inabagan sa lokal nga kagamhanan sa Medellin.

Ang 20-anyos nga si Jimenez gustong mobangon human siya miretiro gumikan kay nahutdan siya og hangin sa iyang away batok ni Cebu-based Leyteño Salatiel Amit sa “Uptown Rumble” fight card nga gidalit sa Omega Sports Promotions International niadtong Hunyo 11 didto sa One Mango parking lot.

Mao kadto ang labing una niyang pilde sa unom ka away uban ang 2KOs.

Si Jimenez mohamag ni Salvador nga beterano sa 36 ka away, apan lima pa lamang ang daog niini, ang katapusan pinaagi sa split decision batok sa Boholanong si Powell Balaba duha ka tuig na ang milabay.

Sa lain pang aksiyon, ang duha ka batos sa Big Yellow Stable nga sila si Marjun Pantilgan ug Cris Ganoza makigtigi ni Rowel Garcia sa Koronadal City ug Roqa Libres sa Bohol, si Ian Refuela sa Chao Sy Stable makigpinaksitay ni Macmac Baribar sa Bohol, samtang si Clyde Azarcon sa Big Yellow Stable makigtakus ni Marlou Talili sa Koronadal. (BANAT PALARO)