Kabalayan ilawom sa MMB gidemolis

CEBU, Philippines - Gidemolis kagahapon ang mga panimalay sa 87 ka pamilya sa Sitio Seaside, Brgy. Pajo, Dakbayan sa Lapu-Lapu alang sa preparasyon paghimo sa dakbayan og Senior Citizen’s Park ilawom sa taytayan sa Mandaue-Mactan Bridge.

Nagkanayon si Mayor Paz Radaza nga dugay nang nahibawo ang mga residente sa maong dapit ilawom sa maong taytayan hinungdan nga nagmalinawon ang pagguba sa ilahang mga panimalay kagahapon.

Gipasaligan ang mga residente nga naapektahan nga prayoridad sila nga kuhaong trabahador ini og sugod na og tukod sa maong parke nga gigahinan og P24 Milyones ni Lapu-Lapu Lone-District Representative Aileen Radaza.

 Ang kapitan sa barangay nga si Junard Chan, nagkanayon nga ang mga gipapahawa nga pamilya naa karon temporaryong nipasilong sa gymnasium sa barangay samtang wala pa silay kabalhinan.

Atol sa gibuhat nga demolisyon, ang siyudad nanghatag og P10 mil ug roofing materials sa mga na-apektuhan nga pamilya samtang ang  Department of Public Works and Highways (DPWH) nanghatag usab og P1,500 ug 20 ka kilo nga bugas.

Si Fedelisa Tojano, 56, usa sa naapektahan miingon napulo na ka tuig siyang nagpuyo sa lugar miingon nga gitugotan silang makabalhin sa Sitio Kamansi sa mao gihapong barangay nga diin mahimutang ang urban poor.

Sa laing bahin, 28 ka pamilyang gipapuyo diha sa karaang building sa Campaña Maritima nanawagan sa siyudad nga tabangan sila tungod kay gipadad-an sila og notisya sa Cebu Ports Authority sa pagbiya sa lugar karong Septiyembre 4.

Usa kanila si Ma. Luisa Ybañez mitug-an sa Banat News nga nabalaka gyud sila kay basin mabalik na usab sila sa aseras kun papahawaon gyud sila sa CPA.

Ang maong mga pamilya gikan sa mga aseras sa dakbayan ug gipanghipos atol sa nagsingabot nga pista sa Senyor Sto. Niño ug 51st International Eucharistic Congress.

Dihang gitawgan sa Banat News si Port Police Supt Arche Guinitaran kinsa maoy gitudlong maoy duolon sa mga pamilya kun aduna silay reklamo sa maong notisya, wala kini makatubag tungod kay aduna pay gitambongang tigom.  (BANAT NEWS)