Iuswag ang eleksyon sa barangay

Pulos pabor sila si House Speaker Pantaleon Alvarez ug Presidente Rodrigo Duterte nga iuswag ang barangay election nga gikatakda unta nga ipahigayon karong Oktobre 31.

Sa Senado, nipalabang na usab og balaudnon si Senador Allan Peter Cayetano, nga nagsugyot sa pag-uswag unya sa 2018 sa eleksyon sa mga opisyal sa barangay.

Ang pag-uswag sa piniliay sa barangay, pabor sa mga naglingkod na apan dili kini pabor niadtong mga gustong magpapili, na ilabi na gayud niadtong nagsige na og suroy-suroy, nagpahigayon na og mga pulong-pulong ug namitay na sa ilang mga pangalan sa mga poste ug kahoy agi og pagpahibawo nga sila mokandidato.

Ang termino sa mga pinili nga opisyal sa barangay tulo ka tuig sigun sa Local Government Code, apan puyde kini nga patas-an sa kongreso pinaagi sa usa ka balaod nga ilang ipalabang nga mag-uswag sa eleksyon.

Ang rason sa presidente sa dili pagdayon sa eleksyon aron makadaginot og bilyones pesos ang gobiyerno ug ang maong kantidad gamiton sa pagpatukod og mga rehabilitation center alang sa mga mitahan nga tiggamitan og gidiling drugas.

Mirason usab si Speaker Alvarez nga maapektohan ang kampanya sa kagamhanan nga nagtinguhang wagtangon ang suliran sa gidiling drugas ug krimen sulod sa tulo ngadto sa unom ka buwan.

Dili usa maglipay ug maguol ang mga naglingkod nga mga opisyal sa barangay, ug ang mga nagtinguha nga magpapili sa umaabot nga barangay election kay dili pa final kining tanan.

Si Alvarez ug Duterte mipadayag pa lang sa ilang pag-uyon nga iuswag ang eleksyon, ug sa ilang pag-uyon wala kini magpasabot nga miuyon na ang mga kongresista ug mga senador.