Sa hamubo nga panahon

Gula 114

Wala na lang mutingog pa si Erica.

"Nahibawo ko nga daghan og gisulti nimo si noy Enting, pero tuohi ko mahal tika ikaw na ang kataposan ug wala na koy laing pangitaon pa," matud pa sa lalaki. Gusto unta sa lalaki nga manuroy sila sa tibuok resort apan mas gipili na lang nga magpundo sa beach house kay taas na kaayo ang adlaw ug init. Ang tibuok beach house na lang ang gilibot sa duruha. Gidala sa lalaki ang babaye sa sports room diin naay billiard table, adunay table tennis, may gamit pa sa pag workout, kumpleto ang tanan sa maong lawak.

Gidala usab ni Andy ang babaye sa entertainment room diin nahasiga ang mata sa dalaga kay sukad masukad kadto pa siya makasulay og sulod sa susama'g lawak nga ingon og mini-theatre. May mga lingkuranan pa nga parehas gyud sa sinehan. Giagda pa sa lalaki kun gusto bang mag videoke sila, apan mibalibad si Erica. Human sa pipila ka minuto nga pagsuroy ni Andy kang Erica sa tibuok beach house miduol kanila si Enting. Nagpahibawo nga naluto na ang gipaluto sa ulitawo busa dungan nga nangaon ang duha. Naghinungitay pa sa makadiyot nahanaw ang gibating kaguol ni Erica uban kang Andy. Ingon og nalimtan niini nga anaa diay siya sa kasub-anan diin gihaya pa sa ila ang iyang inahan. Way sukod nga kalipay ang gibati sa babaye nga gipabati usab sa lalaki ngadto kaniya. Unang higayon nga nagkauban sila apan ingon og pila na katuig nga manag-uyab.May panahon pa nga muhagwa si Andy kaniya.

Maginukdanay sa halapad nga espasyo sa beach house unang higayon nga mikatawa si Erica nga way sagol nga pagpakaaron-ingon, katawa, kamaya nga ingon og way gibati ug gihambin nga kagul-anan. Sa makadiyot na feel sa dalaga kun unsa kaanindot sa kinabuhi kun unsa kaanindot sa kalibutan puy-an. Sa makadiyot gipabati kini ni Andy kun unsa ka importante ug kabililhon sa kinabuhi sa tawo ug ang mga mugna sa Dios alang sa iyang binuhat. Alas kuwatro sa hapon nakahukom ang lalaki nga kinahanglan nang mupauli si Erica sa ila sa pagkabati ni Erica nga mupauli na siya nausab ang timpla sa iyang mood.

"Mupauli na sab ko sa amo mubati na sab ko'g kasakitan Andy," matud pa ni Erica nga guol ang panagway. "Ayaw kaayo padala sa kagul-anan huna-hunaa lang ko kanunay sa panahon nga maguol ka okay?" matud pa sa lalaki nga mihalok sa agtang sa babaye.

"Salamat Andy, bisan sa mubo kaayo nga panahon gipabati ko nimo kun unsay bation kun malipay. Sa mubo kaayo nga panahon, gipabati ko nimo kun unsa ka bililhon ang pagpakabuhi sa kalibutan. Salamat gyud kaayo," ni Erica pa. "Sa tanang higayon Erica I love you so much," matud pa sa lalaki.

"Mahal ta sab ka Andy," tubag sa dalaga  human makailis migikan na sila paingon sa siyudad naabot sa ilang panimalay nga si Otoy lang ang bugtong mitimbaya kaniya.

Sama sa gihapon nahisama siya sa tawo-tawo sa kahumayan. Wala tagda sa ubang mga igsuon.. Si Otoy lang ang dili madala og hulhog ni Lenny nga grabe ang kalagot ug pagdumot sa ilang maguwang. Kanunay nga pagatambagan si Erica sa hinigugma nga pasagdan lang una sila. Human sa pipila ka adlaw nga paghaya sa ilang inahan, pipila ka adlaw nga ingon og mabuak ang dughan sa dalaga diin uban gihapon kaniya si Andy nga mupakalma sa gibati gilubong si nang Minda. Mibuhagay ang daghang luha sa sementeryo mura'g kawad-an sa iyang gininhawa si Erica.

Apan si Melche ug Andy mialalay sa dalaga mihapuhap sa buko-buko.   Milabay ang mga adlaw haw-ang kaayo ang gibati ni Erica ingon og dili na siya komportable sa kaugalingon niining panimalay apan si Otoy kanunay nga magdasig kaniya, kanunay nga ingnon nga pasagdan lang si     Lenny.

Human sa kwarenta deyas sa ilang inahan nakahukom ang dalaga nga motrabaho na pagbalik kay kun magpuyo lang siya sa ila mangamatay sila sa kagutom usa pa pulos nag eskwela ang iyang mga manghud ilakip pa siya nga nag-eskwela sab "maoy akong nadesisyonan nga dili kana patrabahoon sa club Erica ayaw na pagtrabaho," matud pa ni Andy. "Unsa? Dili Andy kinahanglan kong motrabaho pagbalik may mga manghud ko. Nag-eskwela sab ko kinsa na man lay moabaga sa panginahanglan sa pamilya?" matud pa ni Erica. (Sumpayan)