Pagbutang og LRT sa Sugbo gisusi na

CEBU, Philippines - Gibutyag ni Michael Dino ang Presidential Assistant for the Visayas nga adunay mga Singaporean experts nga naghimo og pagtuon sa pagbutang og Light Rail Transit dinhi sa Sugbo.

Si Dino nagkanayon nga nagsugod ang gihimong pagtuon 2 ka semana na ang milabay ug gipaabot nga mahuman tunga-tunga sa bulan sa Oktubre o sa unang bahin sa bulan sa Nobiyembre.

Sa pagkakaron wala pay inisyal nga findings nga nadawat si Dino gikan sa maong mga eksperto, apan matud niya nga iya kining gihatagan sa lista sa iyang gusto lakip na ang pagbutang og LRT gikan sa Dakbayan sa Carcar paingon sa Dakbayan sa Danao ug adunay link padulong sa Mactan Cebu International Airport.

Gibanabanang moabot ngadto sa P38 bilyones ang pagbutang sa LRT diin $30 milyones ang gastohon matag kilometro sa mga elevated areas.

Ang maong proyekto himuon ubos sa Private-Public Partnership nga diin kun duna may gastuhon ang gobiyerno minus ra kaayo.

Matud ni Dino nga ilang gipaabot nga mapatuman ang LRT diri sa Sugbo ubos sa administrasyong Duterte. Ang LRT miani og daghang suporta karon dinhi sa Sugbo human nga makadaghang higayon kining wala tagda sa nangaging mga administrasyon.

Nakita niini nga kinahanglan na gyud sa Visayas ang LRT aron matubag ang problema sa trapiko ilabi na dinhi sa Sugbo ug aron usab paspas ang pagbiyahe sa mga Sugboanon.

Matud ni Dino mamahimo ra nga magdungan ang LRT ug Bus Rapid Transit system diri sa Sugbo tungod kay solusyon man gihapon kini sa problema sa trapiko sa Sugbo apan matud niya angay kini itugyan sa mga eksperto kun unsay tan-aw niini.

Di hinuon buot ni Dino nga unhan ang mga eksperto sa transportasyon ug buot niyang paabuton na lang ang ilang mga rekomendasyon ug sugyot. “Let the experts do the thinking, let them give us proposals” matud ni Dino. (BANAT NEWS)