Mabdos nga ‘pusher’ sikop

CEBU, Philippines - Nagtingkagol karon sa selda sa kapulisan ang usa ka pito ka buwang mabdos uban ang iyang kapuyo human sila nadakpan sa gihimong buy-bust operation sa mga sakop sa Talamban Police diha sa Brgy. Budlaan ning Dakbayan sa Sugbo sa nakalabay nga gabii.

Ang duha giilang sila si Marychel Castro, alyas Che-Che, 26, ug Franklyn Sayarno, 34, nagpuyo sa maong dapit. Ang mga sakop sa Talamban Police nga gipangulohan ni Police Insp. Samson Fornales Go nakadawat og impormasyon nga namaligya ang usa ka alyas Che-Che og drugas sa maong dapit hinungdan sa gilusad nga operasyon.

Nakuha gikan kanila gawas sa napalit sa operasyon ang dugang lima ka gagmay nga pakete ug usa ka medium size pack nga may sud nga gituohang shabu.

Si Police Officer 3 Ernesto Vilvestre sa Talamban Police nga nahinabi sa Banat News nagkanayon nga sa dihang iyang nahinabi si Castro kini mitug-an nga pito ka bulan na kining buntis.

Samtang P128, 620 nga kantidad sa gituhoang shabu ang nasakmit sa kapolisan diha sa Sitio Kaisko, Brgy. Basak, Dakbayan sa Lapu-Lapu sa miaging Martes sa gabii nga niresulta sa pagkasikop ni Jake Talingting, 22.

Ang grupo ni Chief Inspector Mark Gifter Sucalit, Sr. Insp. Verniño Noserale sa Lapu-Lapu City Police Office - City Intelligence Branch ug PDEA-7 milusad og mga operasyon  batok sa mga notadong drug pushers sa siyudad.

Nasikop usab  ang usa ka Mae Salvi Jo Tabotabo, 24, nga nakuhaan usab og usa ka medium pack nga gituhoang shabu ug laing 15 ka gagmay’ng paketeng shabu ang nakuha gikan kang Talingting. (BANAT NEWS)