Naiibang Presidente

Kaiba sa mga naging Presidente

ang kilos at gawi ni Digong Duterte;

Di siya katulad ng taong marami

na ang nasa isip siyang ginagawi!

Ang ugali niya’y kaiba sa lahat

ayaw n’yang tumira sa Malacañang Palace;

Gayong Pangulo na’t doon siya dapat

upang pamunuan bayang nagsasalat!

Sanay kasi na sa Davao manungkulan

dahil siya’y dating mayor na maalam;

Pero ngayong Pangulo ang pamunuan

buong bansa na – baka mahirapan!

Mahirap sa aming naririto sa Maynila

pumunta sa Davao kung may problema;

Kapag kami ay naapi’t walang pera

kanino tatakbo kami ay kawawa!

Sa pagtula-tula ako’y nasa media

na sa bawa’t katha lamang kumikita;

Sa pagkai’t gamot pinagkakasya

hindi ako lumalapit sa mga mapera!

Paris ko lamang na di makahabol

saka nang maraming mga Seniors;

Paano lalapit hihingi ng pabor --

upang mapalaki ang kanilang pension?

At sa huling saknong ng tulang ito

ay hinihiling ko sa Bagong Pangulo

Ang pension ng Seniors ayusin po Ninyo

SSS employees huwag mag-umento!