Mobayad kaha si Duterte og buhis?

Kagahapon mao ang katapusang adlaw nga gisitar sa Comelec ngadto sa mga kandidato nga napili ug napilde sa eleksyon kaniadtong Mayo 9 sa pagsumitir sa ilang Statement of Contribution and Expenditures (SOCE). Ang pagsumitir sa SOCE sa mga kandidato gitumong aron masuta kun wala ba sila molapas sa gitugot nga gastoon sa mga kandidato sa ilang pagpapili.

Sa SOCE, itug-an sa kandidato kun pila ang iyang nadawat nga tabang nga salapi ug kinsa ang mitabang kanila, ug kun pila usab ang iyang nagasto sa pagpapili. Kun ugaling adunay nasubra sa salapi nga gitabang sa iyang pagpapili, puwede kini niya nga iuli sa naghatag o iyahon na lang kini.

Si President-elect Rodrigo Duterte miingon nga nabinlan siya og P1 ka bilyon gikan sa mga natigom nilang salapi nga tabang ug mao kini ang iyang kuhaan sa tag P5 milyones nga reward niadtong makapatay og mga tigpayuhot og gidiling drugas.

Ubos sa Revenue Regulation No. 7-2011 nga gipagawas sa Bureau of Internal Revenue (BIR) kaniadtong 2011, ang subra sa tabang nga salapi sa pagpangampanya sa piniliay kun dili i-uli sa naghatag, ikonsiderar kini nga kita o income sa kandidato.

Kay kini income, busa subject kini sa singko porsiyento nga buhis. Karon paninglan kaha si Duterte og singko porsiyento nga buhis sa iyang tinudlo nga BIR Commissioner?

Kun dili paninglan si Digong sa iyang tinudlo nga BIR Commissioner, mobulontaryo kaha siya sa pagbayad sa buhis sa nahabiling kantidad sa salapi nga iyang natigom gikan sa mga nitabang kaniya pinaagi sa paghatag og kuwarta?

Angay unta nga si Duterte maoy mag-una sa pagbayad og buhis aron mosunod kaniya ang ubang politiko.