Dapit nga lapukon - Gula 31

Samtang nagsud-ong si Mylene kang Pia mihilak usab kini naluoy sa gipamulong sa dalaga.

"Kun makapili pa lang ta'g kinabuhi nga subayon, kun makapili pa lang ang tawo kun unsay gustong kahimtang nga puy-an. Kun mahimo pa lang nga dili mukaon dili siguro mahitabo nga mahipunta ko sa dapit nga giingon nilang lapukon. Apan nasayod ko ma'am, wala matulog ang Ginoo, nasayod siya matag lusok sa luha nga moagas sa akong mga mata sa higayon nga bation ko na ang kakapoy sa pagtrabaho. May mga higayon nga mokalit pagtulo ang akong luha samtang may customer nga mipatong nako diin nagtagbaw sa akong lawas. Pilit nga gipiyong ko ang akong mga mata aron may mahatag ko sa akong mga igsoon, labaw sa tanan mapalit ko ang mga kinahanglanon sa masakiton kong amahan," ni Pia nga wa na kapugngi ang emosyon.

"Salig lang sa Dios Pia," ni Mylene pa nga mihilak na sab.

"Sa tanang panahon ma'am misalig ko niya wala ko kawad-i sa akong pagsalig kaniya nahibawo ko nga muabot ra ang adlaw nga motuang kining mga kasakitan sa akong kinabuhi. Kining kawad-on nga iyang gipatagamtam nako nasayod ko nga kining tanan pagpalig-on sa akong pagkatawo. Paglig-on bisan pa man luyo niini ang gitawag nilang salawayon," pulong pa ni Pia.

"Salawayon ka man sa mga mata sa mga tawong kusog mohukom apan kabulawanon sa imong kasing-kasing Pia. Sa lapukon ka mang dapit naglunang apan bulawan ka sa mga mata sa mga tawong imong gisalbar sa kagutom," ni Mylene pa napugos sa pagpahiyom nga hilaw si Pia.

"Bulawan? Ako bulawan? Kanus-a kaha mahitabo nga ang lapok mamahimong bulawan?" matud pa ni Pia.

"Bulawan ka pinaagi sa imong dedikasyon sa pagpanarbaho tungod ug alang sa imong pamilya. Naputos ka lang sa lapok apan sa sulod sa imong pagkatawo, bulawan ka Pia," matud pa ni Mylene.

" Kun moingon kaha ko ana ngadto sa tawong kusog mohukom sa iyang isig katawo dili ba gud ko nila kataw-an? Pero salamat sa imong pagdayeg nga gipakasama ko nimong bulawan. Salamat kay may tawo pa diay nga dili sama sa uban nga sa tagalog pa, mapanghusga," matud pa ni Pia nga namahid sa iyang mga luha.

"Wala masayop ang akong anak sa paghigugma nimo," matud pa ni Mylene nga nakapakunot sa agtang ni Pia. "Unsa?" bugtong nalitok sa dalaga. "Angayan ka tuod nga higugmaon," matud pa ni Mylene.

"Nagpakatawa man ka ma'am," si Pia nga mikatawa og hilaw. "Wala ko magpakatawa," pulong pa ni Mylene. "Kataw-anan kay si Kyle usa ka matuod nga bulawan, samtang ako usa ka lapok," matud pa ni Pia. "Husto na sa pagsige mo'g paubos sa imong pagkatawo Pia," ni Mylene pa.

"Unsa man, magpakalimpiyo ko nga hugaw man gyud kong tinuod," pulong pa ni Pia.

"Usahay dili ko makasabot nganong isakripisyo man ang gibating gugma tungod lang sa usa ka rason," matud pa ni Mylene.

"Tingali balido ang  akong rason kun nganong gibuwagan ko si Kyle alang ra man sad sa iyang kaayohan ang akong gibuhat. Dali ra ko niyang makalimtan nakasiguro ko ana," matud pa ni Pia.

"Nahibawo ka ba nga nabangga si Kyle niadtong kaadlawon nga gibuwagan mo siya? Ganihang buntag sab, nanghagis sa apartment ug samdan  pa naghubog og maayo. Dili makadawat sa imong pagbuwag niya," matud pa ni Mylene.

"Palihug ko’g ingon niya ma'am nga hingpit na ko niyang kalimtan kay nagsugod na sab ko sa paghikalimot niya.

"Ang tinuod nga gugma dili mahitabong makalimtan kun nahigugma ka sa akong anak, puwede mo bang bakwion mo ang imong hukom nga nakigbuwag ka niya? Puwede bang mag-uli mo si Kyle?" matud pa ni Mylene nga nakapangangha sa dalaga. (Sumpayan)