Duna pay mga BEIs nga wa pa ‘kadawat og honorarium

CEBU, Philippines - Hangtod karon wala gihapon makadawat sa ilang mga honorariums ang ubang mga magtutudlo nga nagsilbing Board of Election Inspectors dinhi sa Dakbayan sa Sugbo ug sa pipila ka lungsod.

Si Dr. Bianito Dagatan, city school division superintendent sa Department of Education nagkanayon nga usa sa nakalangay sa paghatag sa honorariums mao ang pagkasuspenso sa 12 ka konsehal sa dakbayan kinsa mao ang moaprobar niini.“Dili man gyud mandatory for the LGU to give allowance but of course we will be happy if ma-release gyud na siya,” matud ni Dagatan.

Sa pagkakaron, bisan way kasigurohan kun sila mahatagan sama sa ubang mga magtutudlo padayon gihapon ang mga magtutudlo pagduso  sa ilang registration nga gipangayo sa Land Bank of the Philippines aron makakuha sila og ilang cash cards. Gibanabana ni Dagatan nga adunay kapin 800 ka mga presinto ang dakbayan nga adunay tagtulo ka BEIs ug gawas kanila aduna usab mga Comelec support staff nga pahatagan sa maong honorarium.

Mihangyo si Dagatan ngadto sa mga magtutudlo nga magpaabot lang una sanglit aduna kini giagian nga proseso nga dapat sundon.

Sumala pa ni Dagatan, ang kinatibuk-ang madawat sa BEIs P6,500 gikan sa Comelec apan nahatag na ang P2 mil niini atol sa ilang training.

Samtang aduna pa silay gipaabot na lang nga P4,500 nga P1 mil atol sa testing and sealing ug P3 mil sa adlaw na sa eleksyon ug P500 sa transportation allowance, apan wala siya masayod kun pila ang counterpart niini sa mga LGUs.

Apan si Election officer Edwin Cadungog nagkanayon nga adunay posibilidad nga madawat na sa mga BEI ang ilang honorariums sunod semana.

Mibutyag si Cadungog nga aduna pay nahibilin nga mga cash cards sa ilahang opisina nga wa pa makuha.

Ang Comelec nakadawat og mga reklamo nga adunay mga magtutudlong niserbisyo isip BEIs ang wala pa gihapon nakadawat sa ilang honorariums ug ang uban mireklamo nga di ka-withdraw sa ilang cash cards sa mga ATM sama sa lungsod sa Ronda, Minglanilla ug Dakbayan sa Mandaue

Matud ni Atty. Eliseo Labaria ang OIC sa provincial Comelec nga nahatag na nila ang cash cards sa tanan apan kun adunay problema nga dili maka-withdraw ang bangko na ang adunay control niini apan mahimo ra man nga “over the counter” ang pagkuha niini.

Aduna say uban sa isla sa Camotes ug Cordova, dili cash cards ang ilang nadawat kun dili gireleasan gyud kini dayon sa ilang honorarium. Samtang ang ubang BEIs nga aduna nay savings account, diritso na nga gibutang sa Comelec ngadto sa ilang account ang ilang honorarium.

Ang mga BEIs makadawat kini og gikan  P1500 ngadto sa P4500 nga honorarium.  Merybeth I. Fernandez, Le Phyllis F. Antojado ug Racshell Sanchez (BANAT NEWS)