Mayor Sitoy mosuporta ni Duterte

CEBU, Philippines - Giangkon ni Cordova Mayor Adelino Sitoy nga iyang suportahan ang kandidatora ni Davao City Mayor Rodrigo Duterte sa umaabot nga piniliay. Si Sitoy miangkon niini human siya gipangayoan og pamahayag kabahin sa gibutyag sa iyang anak nga si mayoralty candidate Arleigh Sitoy nga ang iyang amahan supporter ni Duterte nga standard-bearer sa partidong PDP-Laban.

Si Arleigh sakop sa Cebu Provincial Board member mibutyag nga duna siya’y nadunggan nga ang Liberal Party sa Cordova nabahin-bahin.

“Wala na siya motuo sa iyahang kandidato (Mar Roxas). Ang kataw-anan lang kay ang pag-adto ni Duterte, nag-ana man pud (niisa sa kumo iyang amahang mayor),” matud ni Arleigh human sa gipahigayon nga forum sa plenary hall sa Ramon Aboitiz Foundation, Inc. sa miaging semana.

Si Mayor Sitoy dihang gipangutana bahin niini miklaro nga nananghid na siya ni Cebu Governor Hilario Davide III bahin sa iyang suportahang presidential candidate tulo ka buwan na ang nakalabay. “Wa pa gani matawo si Arleigh, Duterte nako. Ni-ask nako og permission ni Gov. nga mag-leave sa (LP) three months ago,” matud sa mayor.

Mipasalig hinuon ang mayor nga wala gihapon nawala ang iyahang suporta sa LP ilabi na kang Davide ug sa mga congressional candidates sa partido. Karong eleksyon, ang mayor modagan sa pagkabise mayor ug ang anak niya nga babaye nga si Vice Mayor Mary Therese Sitoy-Cho maoy modagan sa pagkamayor kontra sa igsuong si Board Memeber Arleigh Sitoy. (BANAT NEWS)