Central Visayas 4th overall sa palaro

CEBU, Philippines - Ang Central Visayas mitak-op sa ilang kampanya pinaagi sa pagkubkob og bulawang medalya  sa elementary girls volleyball alang sa malampuson niining paglayat gikan sa ikaunom ngadto na sa ikaupat nga puwesto sa 59th Palarong Pambansa nga pormal nang natapos kagahapong adlawa didto sa Albay Sports and Tourism Complex sud sa Bicol University didto sa Legazpi City.

Human wala makapakita’g aksiyon sa miaging tuig, ang mga batan-on apan madasigon nga magduduwa sa Catmon mibalik dala ang trumpeta sa kadaugan ubos sa bandila sa Central Visayas human ilang gipukan ang Western Visayas, 25-16, 25-23, sa ilang volleyball final match. 

Mao kadto ang ikapitong korona sa Catmon nga naglangkob og talagsaong grandslam niadtong 2007-2009.

Napilde hinuon ang Central Visayas sa National Capital Region, 2-1, sa ilang duwa alang sa secondary football gold. 

Pisikal kaayo ang duwa sa duha ka koponan hinungdan nga dunay kagubot nga miulbo sa tunga-tungang bahin sa second half. Dali hinuon nga nauwang ang nanagbangi nga kampo, apan nagpabiling kalmado ang NCR aron pagsakmit sa bulawang medalya.

Bisan pa man niini, ang Central Visayas milampos sa ilang misyon nga papason ang bati nilang salida sa miaging tuig didto sa Tagum human sila mikatkat sa ikaupat nga dapit bitbit ang 29 ka gold, 31 ka silver ug 29 ka bronze medals.

Sa ika-12 nga sunod-sunod nga higayon, ang NCR maoy miguwang overall uban sa ilang 104 golds, 57 silvers ug 48 bronzes. Biya kaayo ang No. 2 Calabarzon (40-43-59) ug Western Visayas (35-35-39).

  Naglangkob sa top 10 mao ang Northern Mindanao (25-22-36), Negros Island (21-28-39), Socsargen (20-20-29), Central Luzon (17-14-28), Cordillera Administrative Region (12-19-15) ug Davao (8-18-19). (BANAT PALARO)