Bisan way Pacquiao-Bradley fight PPV, TCPS magbantay gihapon

CEBU, Philippines - Bisan pa man og dili kaayo interesado ang mga tawo karon sa away ni Manny “Pacman” Pacquiao sahi sa mga nangagi niyang mga away, ang kapulisan sa Talisay pabilin nga mosuroy sa mga dapit kun hain adunay pay per views.

Si Superintendent Germano Mallari, hepe sa kapulisan sa Siyudad sa Talisay nitug-an sa Banat News nga ang mga tawo sa Talisay medyo nikalma sa ilang interes sa pagtan-aw sa away sa gibansagang “Pambansang Kamao.”

Siya nagtuo nga posible nga nakaapekto ang interes sa mga tawo kang Pacquiao human siya gilupig ni Floyd Mayweather Jr. ug ang matud pa wala kaayo silay mapaabot nga aksyon gikan sa kontra niini nga Amerkano nga si Timothy Bradley.

Sa unang panagsangka sa duha, nidaog si Bradley apan wala makatuo ang mga tawo sa resulta, sa ikaduha nilang panagsangka gikulata ni Pacquiao si Bradley ug siya nakadaog.

Si Mallari nagkanayon nga walay mga establisamento sa dakbayan ang nipahibawo kanila ug nangayo og security kay magpa pay per view sila sa away ni Pacquiao ug Bradley.

"Katong sayu mag-inom unta isulod sa tiyan ang gi-inom ug dili sa ulo kay basin unya og mag-ala Pacquiao ug Bradley unya ni sila nga magsinumbagay," pahimangno pa ni Mallari.

Giawhag usab niya ang mga tawo nga magmabinantayon sa ilang mga butang ug dili lang magsige og tutok sa telebisyon sa pagtan-aw sa boksing. (BANAT NEWS)