Napasagdang krisis sa tubig
Human nagbungul-bungol sud sa daghan na uyamot nga katuigan sa awhag sa mga Sugbuanon pagpanalipod sa lahutay sa suplay sa tubig sa Metro Cebu, nga nahulga tungod sa pinatuyangan nga pagsuyop sa tubig matag adlaw, mahimong mapugos na gyod ang National Water Resources Board (NWRB) sa pagtuman sa ilang trabaho.
Kay di na silang kabalibad ni Senate President Franklin Drilon. Kinsa atol sa iyang pagduaw sa Sugbo gahapon nipasalig sa pag-apura sa NWRB sa paggawas sa ilang ulohang buhatan ug pagpakatap sa ilang presensiya nganhi sa Sugbo ug sa ubang lalawigan gawas sa Metro Manila. Kansang mga tinubdan sa tubig nahudlat sa bangis nga huwaw.
* **
Unang nakapasabot sa kaseryuso sa naghinobrang konsumo sa tubig sa Metro Cebu si Ernie Delco, kanhi general manager sa Metro Cebu Water District (MCWD). Matud niya nitumaw ang gatosan ka pribadong water districts sa Metro Cebu human gibungkag sa Korte Suprema ang monopoliya sa MCWD pila ka tuig ang nilabay.
Matud ni Delco samtang gilimitahan sa MCWD ang tubig nga suyupon gikan sa ilawom sa yuta matag adlaw, mahimong wa maghupot sa samang panagana ang pribadong water districts. Kansang interes sa ginansiya mahimong mas dako kay sa pagpakabana sa umaabot sa Sugbo. Kay ang mas daghang tubig nga masuyop nagkahulogan og mas dakong kita ug ginansiya.
* * *
May kinutoban ang suplay sa tubig sa Sugbo. Kinahanglang higpitan ang inadlaw nga konsumo aron makalahutay hangtod sa umaabot pang katuigan. Mas kritikal ni karon nga nagpadayon pang El Niño ug unya pa sa Hunyo magsugod ang ting-uwan.
Ang paspas nga pagtidlom sa suplay sa tubig sa MCWD sa niaging mga adlaw nakapasamot sa kabalaka nga wa pa gihapon makontrolar ang kinatibuk-ang konsumo sa tanang nagnegosyo og tubig. Gawas sa kanihit sa tubig nga nahiagoman na sa kaliboan ka kabalayan sa Metro Cebu ang naghinobrang konsumo makamugna og higanteng haw-ang. Nga makapaspas sa pagsud sa dagat sa atong mga tinubdan sa tab-ang nga tubig.
* * *
Si Cebu City Councilor Nida Cabrera ang usa sa labing unang nitawag sa atensiyon sa mga Sugbuanon sa dinaliang panginahanglan sa pag-umol og mas malungtaron nga mga sulbad sa kanihit sa tubig sa Sugbo. Gipalihok na sang Gobernador Junjun Davide ang dugay nang nakatug nga Provincial Water Resources Authority (PWRA).
Apan nakaamgo silang Cabrera, Davide ug ubang lokal nga mga opisyal nga bisan unsaon nila og paningkamot naa gihapon sa NWRB ang tinuod nga gahom. Atol sa iyang pagtambong sa Arangkada sa DYAB Abante Pa, Bisaya!, nisaad si Drilon nga iyang susihon may pundo bang NWRB pagtukod og rehiyonal nga mga buhatan. O kinahanglan bang magpanday sila og balaod pagtugyan sa mga gahom sa NWRB ngadto sa local government units (LGUs).
- Latest
