‘Tulisan’ napatay sa mga polis

CEBU, Philippines - Napatay sa kapolisan kaniadtong Huwebes sa gabii ang giingong sakop sa pundok sa mga tulisan nga gidudahang apil sa mga nanulis sa duha ka balay patigayon sa dakbayan sa Bogo.

Si Arnold Torreon, giingong sakop sa Ancero-Sumabong gang, napusilan ug napatay sa mga sakop sa Provincial Intelligence Branch (PIB) sa Cebu Provincial Police Office didto sa Barangay Cansaga, Consolacion.

Matud ni PIB Chief Rodolfo Albutra nga si Torreon gipangita nila human nga nakadawat sila og impormasyon nga nalambigit kini sa pagtulis sa mall ug usa ka cellshop. Dihang nasigpatan nila si Torreon sa Barangay Cansaga ug ila na untang dakpon, ang suspetsado misuway paghulbot og armas gikan sa iyang hawak mao nga ilang giunhan sa pagpusil.

Nakuha sa kapolisan gikan kang Torreon ang usa ka 45 kalibre nga pistola nga may unom ka bala. Mga ID sa pagmaneho’g sakyanan, lisensya sa pag guwardiya ug ID sa Comelec.

Matud ni Albutra nga gawas sa pagpanulis, nakadawat sila og report nga ang grupo nila ni Torreon nalambigit usab sa pagpayuhot og ilegal nga drugas sa Bogo ug amihanang bahin sa probinsya.

Si Albutra miingon nga gitinguha unta nila nga mabuhi pa si Torreon aron ilang masukit-sukit ug maoy rason nga gidala nila kini sa ospital, apan wala na siya maluwas pa.

Ang kapolisan sa Bogo ug mga operatiba sa PIB padayon pa nga nag-imbestigar sa mga tulis sa Bogo aron pag-ila sa mga kauban ni Torreon. (BANAT NEWS)