17th Ornopia Motocross, lumbaon sa Calambua
CEBU, Philippines - Human sa basketball ug fun run, lain na sab nga paugnat sa kusog ang mahitabo didto sa Calambua, San Remigio amihanang bahin sa Sugbo ug ning higayona, puno sa aksiyon ug kulbahinam.
Pagaulohan og 17th Ornopia Cup, ang maong lumba nga gikatakda karong Domingo didto sa world-class Calambua race course magsilbe sab nga maoy opening leg sa 2016 MS Motosuit Motocross Series.
“Nindot gyud handurawon nga gikan sa gamay namong sinugdan, layo na ang among naabtan karon,” matud pa ni MS Motosuit big boss Lou Ornopia.
“Dili lalim mag-organisa og usa ka lumba, apan mapasalamaton ko nga naabot mi og 17 na ka tuig. Dili namo matagamtaman ang kalampusan kun wala sab kadtong mga tawo nga wa’y puas nagpaluyo sa among kalihukan,” dugang pa ni Ornopia.
Kapin sa 50 ka mga riders sa nagkadaiyang dapit sa nasud ang mopakita sa ilang abilidad. Mga bitoon nga angayan lantawon mao sila si Jonjon Adlawan, Jubenile Abellar, John Flores, JC Obligado, BJ Pepito, Ruscel Gungob ug Jonathan Cuyos.
Duna sa’y riders gikan sa Dumaguete, Dipolog, Ormoc, Ozamiz ug Manila.
Mga kategoriya nga kumbatihan mao ang peewee 50cc. ug 65cc., mini 85cc., beginners, local enduro, open enduro, executive A, B and C, novice, intermediate, expert ug pro open.
Gipasiugdahan sa MS Motosuit, ang maong event giabagan nilang Congressman Benhur Salimbangon, Provincial Board Member Sun Shimura, Vice Mayor Al Pestolante, Rizmar de la Peña, Jay Olivar ug Bantayan Vice Mayor Chad Escario Cañares. (BANAT NEWS)
- Latest
