Mr. Barangay

Brgy Dumalan, Dalaguete, Cebu

"Ang problema namo diri sa Sitio Candicay mao ang grabeng sugal, sama sa hantak. Gipasagdan ra man ni sa mga opisyal sa barangay ug mga polis.

 Brgy Cabancalan, Mandaue City

“Ngano man nga ang mga driver sa tricycle nga nagbiyahean paingon diri sa among lugar tag P8 man gihapon ang ilang ipaplite bisa’g duol ra kaayo ang iyang destinasyon.”

 Brgy Tabunok, Talisay City

“Nahasol gyud mi diri sa pagdagsang na sa mga mangunguot. Unsa man kaha ang angay namo nga buhaton aron mahunong kining binuang sa mga abusadong tawo?”

 Brgy Balisong, Argao, Cebu

“Nalipay unta mi nga may mga computer niabot diri sa elementary school kay para magamit sa mga bata. Pero hangtod karon wala man makagamit ang mga bata, pero ubang tawo, apil na habal-habal driver, yano ra man makasulod sa computer room unya makagamit sa computer.”

 Brgy San Vicente, Liloan, Cebu

“Dunay pabrika diri sa among dapit nga buhatanan para snacks pero mura man og way klaro nga sanitary ang ilang pabrika kay hugaw man kaayo ang palibot. Maayo unta’g masusi kini sa mga opisyal namo sa lungsod.”

 Brgy Kabac, Bantayan, Cebu

“Diri sa among lugar puwerte na man lang gyung gubaa sa among provincial road. Upat na ka tuig namo ning giagwanta nga problema, apan hangtod karon wala man gyuy nagpakabana nga mga opisyal sa among lugar.”

 Brgy Apas, Cebu City

“Diri sa among lugar sa Purok 6, Sitio San Miguel, magbaha na man bisa’g hinay kaayo ang uwan. Ila man gud gipasirad-an ang kanal sa usa ka abogado mao nga mapundo kanunay ang tubig nga maoy nakahasol kanunay sa mga nagpuyo diri.”

 Brgy Sangi, Toledo City

“Concern lang gyud kaayo ko bahin sa grabe nga pagkadaghan sa mga basura nga wala gyud maatiman pagkuha. Manghinaut mi nga matagad na unta dayon ni sa mga opisyal sa among barangay ug sa lungsod.”

 Brgy Casuntingan, Mandaue City

“Ireklamo namo ang grabe nga pag-abuso sa ubang tricycle drivers kay ang plite nga ilang kolektahon gikan sa merkado paingon sa Gaisano Casuntingan tag P9 na man nga unta duol ra man kaayo ang biyahe ug barato na ang gasolina.”

 Brgy Poblacion, Toledo City

“Diri ‘sab sa among lugar ang ubang tricycle drivers maningil gihapon og P8 nga plite bisa’g kun duol ra kaayo ang imong padulngan.”

 Brgy  Tan-Awan, Oslob, Cebu

“Ako lang ni ireklamo ang ubang maestra sa among elementary school kay grabe na kaayo ang ilang panguwarta, kay ultimo mga manindahay sa gawas sa eskwelahan, ila man pangayoan og arkabala nga unta dili na man nila hurisdiksyon ang naninda sa gawas sa compound.”

 Alang sa inyong mga reklamo text lang sa 09062973166