85-anyos gitulis gipatay

CEBU, Philippines - Samad pinusilan sa tangkugo ang naangkon sa usa ka 85- anyos nga lolo nga nakit-ang patay sulod sa iyang balay diha sa Sitio Guimpilakan, Barangay Kanluhangon, Lungsod sa Tabuelan sa nakalabay nga gabii.

Giila ang biktima nga si Jesus Montealto, nga nakita nga naghawid pa og sundang samtang nagbuy-od sulod sa balay, timailhan nga nisuway pa kini pagsukol sa tawong nipasipala kaniya.

Matud pa ni Senior Inspector Welther Grapa, hepe sa Tabuelan Police nga usa ka pastor sa Seventh-day Adventist nga si Pastor Ron Adlai Fajilan, 43, kauban ang usa ka silingan sa biktima ang unang nakakita sa patay nga lawas ni Montealto nga nag-inusarang nagpuyo sa balay.

Ang pastor matud pang Grapa anha magkatulganan sa balay sa biktima matag aduna kini himuong “Bible study” sa maong barangay  nga nahimutang sa utlanan sa mga lungsod sa Borbon, Tabogon ug San Remegio. Sa inisyal nga imbestigasyon sa kapulisan, upat ka mga tawo nga nagtaptap sa ilang nawong maoy mihimo sa krimen base sa pamahayag sa usa ka testigo nga nakakita nga nanulod sa balay sa biktima.

Nagtuo si Grapa nga nakabantay ang biktima ug nipasalipod sa bungbong sa iyang lawak ug nagkupot og sundang apan gipalapsan og bala sa mga kriminal ang lawanit nga bungbong ug naigo si Montealto sa tangkugo ug namatay.

Human napusilan ang biktima mikuha og hagdanan ang mga kriminal ug giguba ang bintana ug nanulod dayong kuha sa mga butang ug kwarta sa biktima.

Ang biktima usa ka mag-uuma nga nanag-iya og kayutaan sa bukirang bahin sa maong dapit, padayon pa ang imbestigasyon sa maong insidente. (BANAT NEWS)