Bana gibuhian apan…

CEBU, Philippines - Gipapauli sa kapulisan ang bana sa babaye nga nakit-ang patay nga adunay samad pinusilan sa ulo ug gigapos ang mga tiil ug kamot sulod sa iyang sakyanan diha sa daplin sa dalan sa Almendares, barangay Mabolo ning dakbayan sa Sugbo niadtong nakalabay nga buntag.

Ang Homicide Section sa Cebu City Police Office miimbitar kang Wayne Christopher Uy tungod sa pagkakaplag sa patay’ng lawas sa iyang asawa nga si Agnelen Uy, 31, sa sakyanan niini niadtong miaging adlaw.

Giimbitar siya aron patubagon sa mga pangutana kabahin sa kamatayon sa iyang asawa. Ang hepe sa Homicide Section, Senior Inspector Elisandro Quijano nagkanayon ilang gitan-aw ang tanang mga anggulo ug lakip niini ang posibilidad nga adunay kalabutan sa krimen ang bana sa namatay.  Gani gikuhaan og fingerprints ug gipaubos sa paraffin test si Christopher.

Nangita pa og dugang mga ebidensya ug mga testigos ang mga imbestigador aron maestablisar  ang motibo ug aron ilang mailhan kun kinsa ang nagpatay sa biktima.

Ang kapolisan aduna nay duha ka testigo apan dili pa paigo ang ilang testimonya aron makapasaka og kaso. Wa molimod si Quijano sa mga tigbalita nga usa sa ilang gitumbok sa imbestigasyon mao ang bana sa namatay.

“Kung maka-gather na ta og enough evidence nga mo-pinpoint sa iyang husband ato gyud file-lan og kaso, so dili pa siya off the hook, ato lang siya’ng gi-invite kagahapon kay obviously, person of interest man siya,” dugang pa ni Quijano.

Matud pang Quijano, sa buhi pa ang ginang, gikatahong nidangop sa kapolisan sa Mandaue ang bana human kini nakadawat og text nga naghulga kaniya nga siya patyon sa namatay.  Ang duha giingong upat na ka tuig nga wala nag-ipon.

Ang bana mibutyag sa mga polis nga nagkauban sila sa iyang asawa ug nag-estoryahanay bahin sa ilang plano nga annulment dihang kalit lang adunay usa ka motorsiklong nibabag sa ilang agianan niadtong Domingo sa gabii.

Ang duha ka  armadong lalaki pugsanong miilog sa ilang sakyanan ug gidala ang iyang asawa. Lunes pagkabuntag dihang nakit-an ang iyang sakyanan sa Mabolo ug diha sa sud ang patay’ng lawas sa iyang asawa.

Adunay nakuhang footage sa CCTV nga nagpakitang usa lang ka lalaki ang  mikanaog sa sakyanan.

Ang acting city police director Sr. Supt. Marciano Batiancela Jr. miingon nga ilang gipapauli si Christopher tungod kay wala silay ebidensya nga magtumbok niini nga kini maoy mihimo sa krimen.  (Jojo C. Ugdol ug Rowena Capistrano/EIM)(BANAT NEWS)