Game-1 sa CESAFI juniors division

CEBU, Philippines - Sugdan karon sa Sacred Heart School-Ateneo de Cebu Magis Eagles ang ilang  kampanya alang sa ‘back-to-back’ championship dihang ilang harungon ang University of Cebu Junior Webmasters sa Game-1 sa ‘best-of-three’  finals series  sa 15th Cebu Schools Athletic Foundation, Inc. (CESAFI) basketball tournament diha sa Cebu Coliseum.

Ang Magis Eagles ug Junior Webmasters gitakdang magsangka sa alas-5:15 sa hapon sa dili pa magsangka ang defending champion Southwestern University Cobras ug University of San Jose-Recoletos Jaguars nga magtigi sa kaugalingon nilang ‘best-of-three’ series alang sa ikatulong dapit   sa seniors division sa alas-6:45 sa gabii.

Mas inilog karon ang Magis Eagles batok sa Junior Webmasters, kinsa ilang gipilde atol sa ilang duha ka duwa niini nga season.

Ang Magis Eagles pangulohan ni Jed Colonio, kinsa maoy labing masidlakon nga bitoon sa koponan tungod sa iyang all-around playing skills.

Ang Magis Eagles ni coach Rommel Rasmo makasalig nilang Andrew Velasco, Travis Mantua, Renzo Calumpang ug Alex Visser  Errol Pastor, Wayne Bersaluna ug Patrick Wilson Yu.

Sa laing bahin,  walay laing paagi ang mga gagmay’ng Junior Webmasters ni coach Joever ‘Brad’ Samonte kun dili paspasan ang duwa aron adto daugon ang lahutay sa hangin.

Ang Junior Webmasters adunay Big Three nga silang Froilan Mangubat, Jason Florence Abejo ug Luigi Konrad Gabisan nga mao kanunay  ang modala sa opensa apan dili matagna ang mahimo sa gamitoy nga guwardya nga si Gelmart Umpad nga usa sa maayong nakaduwa dihang gitagak  nila ang University of the Visayas Baby Lancers. (BANAT NEWS)