Nagpungasi ang career

CEBU, Philippines – Gawas sa seryeng  “And I Love You So” , malakip usab si Inigo Pascual sa umaabot nga serye sa ABS-CBN nga “Written in Our Stars” nga pagabitoonan nila ni Toni Gonzaga, Sam Milby, Jolina Magdangal ug sa iyang amahan nga si Piolo. Mapasalamaton si Inigo sa iyang amahan nga si Piolo Pascual gumikan kay mao kini ang mentor niya sa pag-arte.

Natural ang pag-arte

Gibutyag ni Alex Medina nga matawag gyud niya nga dili basta-basta nga artista si Angelica Panganiban gumikan kay natural gyud ang pagdala niini isip kontrabida sa seryeng Pangako Sa Yo sa ABS-CBN.

Init nga eksena

Gipadayag ni Ejay Falcon nga nagbaha ang mga init nga eksena sa ikaduhang hugna sa seryeng Pasion de Amor. Tungod sa maong serye, nagkalawom na ang pagtinagdanay nila ni Ellen Adarna.

Wala kaabot

Wala na makaabot si Coco Martin sa Star Magic ball gumikan kay gabii na  ang flight niini  gikan sa Davao paingon sa Manila. Si Coco unta ang maka-date ni Julia Montes sa maong party.

Misuway sa og arte

Nahugyaw ang fans sa singer nga si JayR gumikan sa paglugwa sa ilang idolo sa sitcom sa ABS-CN nga Home Sweetie Home, nga gibidahan nila ni John Lloyd Cruz ug Toni Gonzaga. Samtang giangkon sa singer nga na-enjoy siya sa pag-arte sa maong programa busa andam siya modawat og laing acting project.

Pakyas ang misyon

Natultolan na unta ni Ai Ai delas Alas ang nahimutangan sa amahan ni Jiro Manio didto sa Japan apan wala niya kini nahinabi sa personal gumikan kay duna kini sakit. Gipadayag sa aktres nga huwaton na lang niya nga maarang-arang na ang kondisyon sa amahan ni Jiro. Nagmalaumon gihapon si AiAi nga magkaabot sa saktong panahon sila si Jiro ug ang iyang amahan.

Grabe kabuotan

Gibutyag ni Erich Gonzales nga usa sa nauyonan niya nga batasan sa iyang uyab nga si Daniel Matsunaga mao ang pagka-diyosnon niini.  Usa kini sa rason nga dili gyud malilong ang kabuotan sa aktor.

Enrique mihangyo

Nihangyo si Enrique Gil ngadto sa iyang fans nga mohunong na sa pagpangatake og mga artista nga nahasol niya sa dihang nahubog siya sulod sa eroplano paingon sa London aron dili na modako ang maong butang. Kahinumduman nga nibahad ang inahan ni Jessy Mendiola nga mokiha kang Enrique sa nadangatan sa iyang anak. Nahagit ang inahan ni Jessy gumikan kay biktima sa pagpangatake ang iyang anak gikan sa fans ni Enrique.

Liberal gibalibaran ni Dingdong

Ang mga kadagkoan na gyud sa Liberal Party ang mihangyo kang Dingdong Dantes nga padaganon kini og senador karong 2016.  Gibalibaran kini ni Dingdong gumikan kay prayoridad niya ang iyang pamilya ug career.

Manager ang bana

Mapasigarbohong gipahibalo ni Manilyn Reyes nga ang iyang bana nga si Aljon Jimenez maoy mibarog karon nga iyang talent manager. Gipasalig ni Manilyn nga dili maglisod si Aljon sa paghupot kaniya.