EDITORYAL - Pagpakabana

Makaisa og kilay kining balita kabahin sa mga Taiwanese ug Chinese nationals nga nag-operate og 'cyber-blackmail' dinhi sa dakbayan sa Sugbo. Hinuon nangadakpan ang 68 nila ka mga sakop ug ambot kaha kun duna pa bay lain kanila dinhi.

Dili kini maoy labing una nga kaso dinhi sa nasud, pipila ka tuig na ang milabay adunay susama gihapong grupo nga nadakpan didto sa Luzon ug sama sa modus sa mga nadakpan dinhi, mga Taiwanese gihapon ang ilang biktimahon didto sa ilang nasud. Maayo na lang nga nadakpan ni sila, apan nahimo kini pinaagi sa pag-abag sa mga otoridad sa Taiwan, kun di pa kanila, way kalibotan ang lokal natong kapolisan.

Pokus ra man gud kaayo ang atong otoridad pagkombate sa terorismo ug sa krimen sa lokalidad. Siguro tungod kini kay di pa dugay nisud sa internet age ang PNP.  Dinhing dapita kuwang og kahimanan, katakos ug mga sakop ang atong mga otoridad sa anti-cyber crimes aron mapalig-on ang monitoring sa internet sa nasud.

Nagpabaya usab ang mga barangay officials, homeowners associations ug uban pa sa lokalidad pagpaniid sa ilang palibot. 

Kun ang mga tag-iya sa mga panimalay unya maoy pangutan-on hayan mangrason ra sila nga wala sila masayod nga ingon niana ilang buhaton kay nagtuo lang silang puy-anan lang ang ilang tuyo.

Usa kini ka timailhan nga sayon diay sudlon ang Pilipinas og mga international syndicates kay huyang ang seguridad.

Kompiyansa usab kaayo ang mga lokal nga opisyal sa kabarangayan mao nga wala nila monitora ang mga bag-ong namuyo sa ilang mga lugar sama sa mga langyaw nga niabuso na sa pagkamaabi-abihong kinaiya sa mga Filipino.

Ang seguridad kaakohan sa tanan, dili angay nga isalig lang ang tanan sa atong law enforcers aron pagsiguro niini kondili hasta sa mga yanong molupyo. Kinahanglang magpakabana.