Nakadasmag gipusil

CEBU, Philippines – Kritikal ang kahimtang sa usa ka drayber sa motorsiklo human kini gipusil sa liog sa anak sa iyang nabanggaan diha sa national highway sa Brgy. Buanoy lungsod sa Balamban pasado alas 7 sa nakalabay nga gabii.

Ang napusilan naila nga si Simon Niñal, taga Brgy. Sagay dakbayan sa Toledo, samtang ang suspetsado naila nga si Marvin Sanchez, 20, nga anak ni Jerick Sanchez, 46, nga maoy nabanggaan og motorsiklo.

Matud pa ni Police Officer 1 Moncheto Clarin ang desk officer sa Balamban Police nga nahinabi sa Banat News gikan sa norte nga bahin si Niñal padulong sa habagatan ug pag-abot sa maong dapit iyang nabanggaan si Jerick nga nagkugos sa iyang usa ka tuig nga anak human kini kalit nga mitabok sa kalsada.

Apan human sa aksidente pipila ka minutos naabot sa lugar si Marvin nga nagbitbit og armas dayong pusil sa drayber sa tangkugo niini hinungdan nga nakuyapan.

Human sa pagpamusil dali nga misibat ang mag-amahan, apan sa gihimo nga follow-up operation sa Balamban Police nadakpan ang duha.

Samtang ang drayber sa motorsiklo ang gidala sab dayon sa kapitan sa barangay sa Balamban Provincial Hospital.

Apan gumikan sa kadelikado sa kahimtang ni Niñal  gibalhin sab kini dayon sa tambalanan dinhi sa siyudad sa Sugbo.

Si Clarin miingon nga ilang giapil og dakop ang amahan nga si Marvin kay kini apil nga mitabang sa iyang anak nga makasibat human sa pagpamusil.

“Imbes siya mao’y nabanggaan, siya na hinuon ang napriso karon, apil pa ang iyang anak nga init og ulo, nabale na hinuon ang sitwasyon,” matud pa ni Clarin.

Mag-atubang og kaso ang duha ka mga suspetsado nga gipaslak sa selda sa Balamban Police Station. – /EIM) (BANAT NEWS)