Iza pasok sa Showdown

CEBU, Philippines - Nalakip si Iza Calzado sa  cast sa  international movie nga  “Showdown in Manila” nga kasamtangang gi-shoot karon sa Pilipinas. Kauban niya ang Hollywood stars nga sila si Tia Carrere ug Casper Van Dien ug ubos kini sa direksyon ni Mark Dacascos.

Lahi ang baruganan

Gidayeg ni Robin Padilla si Nora Aunor gumikan sa maisugong pagsaway niini kang Presidente Noynoy Aquino, apan dili siya uyon sa panawagan sa aktres nga kinahanglan nga mo-resign na ang presidente.

Nakasuway na

Gipadayag ni Robin Padila nga naka-recover dayon siya human nakuha ang gisabak ni Mariel Rodriguez gumikan kay nahitabo na sad kini sa kanhi niya asawa.  Tsika pa ni Robin nga apektado gihapon hangtud karon si Mariel sa maong hitabo.

Sakto ra

Wala’y plano ang magtiayong Zoren Legaspi ug Carmina Villarroel nga sundan ang  kaluha nila nga anak nga sila si  Cassy ug Mavy. Suma pa sa duha nga kontento na sila sa istado sa ilang pamilya.

Magpakasal sa gawas

Tsika pa ni Solenn Heussaff nga sa laing nasud sila magpakasal sa iyang Argentinian boyfriend nga Nico Bolzico. Gusto ni Solenn nga ihilom lang ang ilang kasal  pinaagi sa pribadong seremonya.

Alang sa kaugmaon

Nagplano si Rocco Nacino nga magpatukod og restaurant ug gikatahong pagpangandam na kini alang sa kaugmaon nila ni Lovi Poe.

Love Revisited

Human sa lima ka tuig, naka-release na gyud og bag-ong album si  Nikki Gil nga nag-ulohan og  “Love Revisited,” ubos sa  Universal Records. Usa sa unod niini mao ang awit nga  “When I Met You,” nga orihinal nga gikanta sa  APO Hiking Society.

Jopay nakuhaan

Nakuhaan sa iyang gisabak niadtong miaging adlaw ang  kanhi SexBomb dancer nga si Jopay Paguia. Napu ka semana nga nagsabak si Jopay. Mao na unta  kini ang labing una nga anak nila ni  Joshua Zamora “Things happen for a reason, and only God knows everything, sometimes we can only ask, and the best answer we get is God’s love never fails, never gives up. He remains faithful,” suma pa ni Jopay.

Traditional wedding

Gipadayag ni Nikki Gil nga tradisyonal lang ang tema sa ilang kasal ni BJ Albert karong tuiga. Dili sila ganahan og daghang kuti sa himoon nila nga preparasyon.

Dali kaayong nausab

Sukwahi sa unang nabalita kagahapon nga nagbaylo na og titulo sila si Bb. Pilipinas Intercontinental  Christy Lynn McGarry ug Bb.Pilipinas Supranational Rogelie Catacutan, dili na mahinayon ang maong kalambuan.

Una niini, gipatawag matud pa sa mga abogado sa Bb. Pilipinas Charities Inc., sila si Catacutan ug McGarry niadtong Miyerkules sa hapon ug gipahibawo nga magbaylo sila og mga titulo, hinungdan nga dali kaayong nikatap sa nagkadaiyang social media networks ang maong balita.

Kahinumduman nga nakasalmot na sa Miss Intercontinental pageant niadtong 2010 si Mc Garry diin nalakip siya sa top15 ug gihatagan og titulo nga Queen of Asia and Pacific, maoy hinungdan nga gitun-an sa BPCI ang angayan nilang buhaton alang sa maong sitwasyon.

Apan pipila ka oras ang nilabay human daling nikatap ang balita nga nagbaylo na og titulo si Catacutan ug McGarry, niluwat og pamahayag si BPCI chairperson Stella Marquez Araneta pinaagi sa ilang Facebook page nga gibasura na ang posibilidad nga “switching of titles”.

Buot pasabot, si McGarry gyud maoy subling makigtigi para sa Pilipinas sa umaabot nga Miss Intercontinental pageant samtang mahinayon si Catacutan sa Miss Supranational 2015.

Sulagma lamang?

Trending karon kining maong hulagway sa Facebook gumikan kay medyo sulagma matud pa ang maong posisyon sa kanhi mga mananaog sa Bb. Pilipinas pageant.

Niadtong si Miss Universe 2012 First Runner-up Tugunon ang gikoronahan ni Miss Universe 2011 3rd  Runner-up  Shamcey Supsup, klaro kaayo nga naa si Bb. Pilipinas Universe 2014 Mary Jean Lastimosa.

Sa nilabay nga tuig, dihang si Lastimosa na ang gikoronahan ni Miss Universe 2013 3rd Runner-up  Ariella Arida, tataw nga naa sab sa ilang likod si Bb. Pilipinas 2015 Pia Wurtzbach.

Ang pangutana: Kinsay diha sa likod ni Wurtzbach niadtong gikonahan siya adtong Domingo. Hayan mao na sab to ang sunod nga mudaog.

Vandolph nabangga, luwas!

Luwas ang aktor nga si Vandolph Quizon human kini nalambigit sa road accident  kagahapon sa  Sucat Road, Parañaque.

Suma  pa sa report nga nabangga ang  Toyota Fortuner  sa aktor ngadto sa boundary sign ug natapsingan  niini  ang  tawo  nga  nagsakay  og  motorsiklo .

Dunay nitumaw nga mga pasiunang report nga matud pa nabuslot  ang ligid sa  sakyanan ni  Vandolph hinungdan nga kalit kini nga nibanda sa pikas dalan habig sa Ninoy Aquino International Airport (NAIA) Terminal 1.

Kahinumduman nga niadtong, 2001 , nalambigit  usab si Vandolph sa road accident kung diin nabangga ang iyang F150 pick-up  ngadto sa Isuzu Elf Truck sa Pangasinan ug nakabsan sa iyang kinabuhi ang iyang girlfriend nga si .Desiree “Ishi” Raquiza .

Willie blocktimer sa GMA

Blocktimer lang si Willie Revillame sa GMA-7 alang  sa umaabot niya nga game show sa maong istasyon .

“Blocktimer siya, hindi siya station-produced,” suma pa ni Redgie Acuña-Magno, ang Vice President for Drama Productions sa GMA-7.

Buot pasabot sa blocktimer mao nga mupalit si Willie og oras sa network aron ikapasalida ang iyang game/variety program sama kaniadto sa iyang gihimo sa TV5.

Suma pa nga padayon ang negosasyon kabahin niini, diin usa si Joey de Leon sa mitabang gayud kang Willie. Wala pa matino kanus-a gyud masud-ong ang nahisgutang show.

Adam nakasala sa iyang fan

Natarantar og maayo ang  Maroon 5 frontman nga si Adam Levine human naigo ang iyang fan sa dihang gilabay niya ang iyang mikropono  atol sa iyang concert sa Toronto dili pa lang dugay.

 Gikatahong nalabay ni Adam Levine ang  mikropono human kini napungot gumikan kay dunay problema sa pag-  sound check.

Usa ka fan ni Adam  nga ginganlan og  Stephanie Green ang naigo sa mikropono partikular na sa ulo nga niresulta sa paghubag niini, apan imbis nga masuko, giingong gikilig kini ug nisaka sa entablado ug gigakos ang iyang idolo.