Panumpa nga bakak
Nagpahiyom si Janeth nga milingi kang Jeffrey. Napahunong sila tungod kay stop man ang signal pag-abot nila duol sa simbahan sa Mabolo. Mahinamon nga nagpaabot si Jeffrey kun unsay itubag kaniya ni Janeth.
“Wa ka man motubag nako Neth. Uyab na ‘sab diay ta kay imo man ko’ng partner karong higayona nga mag-night swimming ta,” follow-up nga pangutana ni Jeffrey.
Takulahaw lang nga mibaiid si Janeth kang Jeffrey. “Angay pa ba gud nga isulti nako? Dili ba masabtan man sa akong linihokan? Action speaks louder than words,” matud ni Janeth.
Ingon sa natulala kadiyot si Jeffrey. Misibaw ang serbato sa ubang sakyanan nga diha sa ilang likud kay kaganina ra diay nga Go ang signal ug wala dayon makapadagan si Jeffrey.
Paspas nga gipabulhot ni Jeffrey ang Mitsubishi Strada ug pareho sila nga nag-agik-ik kay nahimuot kaayo sila. “Salamat kaayo Neth nga wala diay ko nimo pakyasa sa akong gugma nimo,” ni Jeffrey pa nga mihana og agbay kang Janeth.
“Uy, uy, pagtarong diha’g drive kay mabangga ta. Unya na kanang agbay-agbay kun tua na ta sa beach,” matud ni Janeth nga walay hunong sa pag-smile.
Kay tinted man ang bildo sa sakyanan ug kilum-kilom na, sigurado si Jeffrey nga dili sila makita sa mga kauban ni Janeth nga tua maglingkod sa likud nga bahin sa sakyanan.
Nalangan na usab sila kay traffic kaayo sa Tipolo, Mandaue . Apan hilom nga gikahimuot kini ni Jeffrey nga dili sila makapaturatoy pagpadagan.
“Kiss ko bi kay uyab na man kaha ta,” giingnan ni Jeffrey si Janeth. Abtik kaayo nga mipaduol ang dalaga sa iyang mga ngabil. Sa una’ng higayon nagtagbo ang masig nila ka mga ngabil. (Sumpayan)
- Latest
