Dili makahimo

Dear Tita Salie,

Kumosta? Unta anaa ka kanunay sa maayo’ng panglawas. Usa g’yud ko sa nagsunod og basa niini’ng column Pasabta Ko. Akong pangayoan og tambag kanimo kun angay ba gayud kita’ng mangayo’g pasaylo sa atong nasad-an? Alang nako Tita Salie, lisud kaayo uy. Dili ko makahimo, Tita.

Unsa’y maayo’ng buhaton? Salamat sa pagtagad nimo ni’ng akong pangutana. More power to you.

* * *

Maayong adlaw,

Wala’y tawo, bisan siya maalamon nga dili makahimo og kasaypanan. Tungod kini kay kita natawo nga dili hingpit. Kita’ng tanan makasala gayud, bisan ikaw.

Hinumdomi lang nga si Ginoo’ng Jesus namatay aron sa paglukat sa atong mga sala. Ug bukas ang kahigayonan nga kita makahangyo kaniya sa pagpasaylo kun kita makasala.

Ug ang Mateo 6:14, 15 nagaingon: “Kay kun kamo magapasaylo sa mga tawo sa ilang kalapasan, pasayloon usab kamo sa inyo’ng langitnon nga Amahan; apan kun kamo dili makapasaylo sa mga tawo sa ilang kalapasan kaninyo, dili usab pasayloon sa Amahan ang inyo’ng kalapasan.”

Busa, importante gayud ang pagpasaylo bisan tuod lisod kini buhaton, ilabi na kun bug-at gayud nga sala ang ilang nahimo. Apan buhata kini kay makahatag kini’g kalinaw sa hunahuna. Tita Salie