Melissa nanganak na!
CEBU, Philippines – Nanganak na si Melissa Ricks alang sa labing una nga anak nila sa iyang boyfriend nga si Charles Togesaki niadtong Lunes. Usa ka himsog nga batang babaye ang gihimugso sa aktres ug ginganlan ang maong bata og Kiera Kelly nga dunay gibug-aton nga 7.07 lbs.
Paneguro
Wala pa’y acting projects nga nakalinya ang anak ni Ai Ai delas Alas nga si Sancho gumikan kay gipaubos pa kini og lapad nga acting workshop. Giseguro lang ni AiAi nga dili siya mauwawan sa direktor nga makatrabaho puhon sa iyang anak.
Iñigo mihimakak
Gihimakak ni Iñigo Pascual ang report nga matud pa dungan niya nga gipanguyaban sila si Julia Barretto ug Sofia Andres. Nasayran nga si Sofia ra ang gidiskartehan ni Iñigo kinsa nakauban niya sa pelikulang Relaks, It’s Just Pag-ibig .
Ikaw na Empoy!
Gitataw ni Empoy Marquez nga naka-kontrata siya sa TV5 alang sa iyang TV projects. Gibutyag pud sa komedyanteng aktor nga mahimo rapud siya modawat og movie projects sa Star Cinema.
Motabang ni Binay
Bisa pa man nga dili na modayon si Ai Ai delas Alas sa pagsulod sa politika karong 2016, aktibo gihapon ang aktres sa organisasyon nga magsuporta kang Bise Presidente Jejomar Binay kinsa modagan pagka-presidente.
Negosyo ni Gerald
Gipaneguro ni Gerald Anderson nga duna gihapon siya’y income kung maabot ang panahon nga mawala na siya sa showbiz busa nag-negosyo ang aktor og travel agency. Adunay mga partner si Gerald sa nahisgutang negosyo.
Katrina ug Dra. Belo nagtingog
Gibutyag ni Katrina Halili nga nagtagad na sila ni Dra. Vicki Belo ug nahitabo kini sa kasal nila ni Dingdong Dantes ug Marian Rivera. Kahinumduman nga taud-taud na nga wala magtingog ang duha human nalambigit si Katrina niadto sa uyab ni Dra. Vicki nga si Dr. Hayden Kho Jr..
Gab nakatrabaho si Jessica
Si Gab Valenciano maoy direktor sa music video ni Jessica Sanchez nga “This Love” . Dakong garbo alang kang Gab nga makatrabaho ang usa ka international star. Kahinumduman nga nahimo usab nga consultant si Gab sa music video niadto ni Beyonce nga “7/11”.
Hinatag ni Derek
Hinatag ni Derek Ramsay ang iro nga nakapaak sa anak ni Kris Aquino nga si Bimby. Pinangga kaayo ni Bimby ang maong iro nga ginganlan og Prada.
Pasok sa Star Cinema movie
Nalakip ang Kapatid star nga si Jasmine Curtis Smith sa umaabot nga pelikula sa Star Cinema nga Halik sa Hangin nga pagabidahan nila ni Gerald Anderson, Julia Montes ug JC de Vera.
- Latest
