Kinsay modupa nato?
Lain na sang dakong us-os sa presyo sa krudo, gasolina ug kerosene ang gipatuman sa higanteng mga kompaniya sa lana sugod ganinang kadlawon. Nidason ni sa pasalig sa mga eksperto nga wa pay timaan nga mohunong na ang padayong pagbarato sa lana sa merkado sa kalibotan. Sukwahi ni sa pag-insistir sa transport groups ug mga negosyante sa pagpabilin sa taas nilang plitehan ug presyo tungod sa kabalaka nga mobalik paglayat ang presyo sa lana sa mosunod nga mga adlaw.
Gibanabanang usa ka bilyon ka baril sa lana ang sobrang suplay sa merkado sa kalibotan. Di ni mahurot sa mosunod nga unom ka buwan.
***
Hinaot nga gamiton sa mga pasahero ug mga konsumidor kining kasayuran sa tinuorayng kahimtang sa industriya sa lana aron mas agresibong iduso ang mas dako ug mas dinaliang pag-us-os sa plitehan ug presyo sa mga palaliton.
Matag nangaging saka sa presyo sa lana gigamit nilang sukaranan sa pagpa-usbaw sa plitehan ug presyo. Apan tak-om sila sa niaging unom ka buwan nga nagsige og tibugsok ang presyo sa lana. Panahon nang kita na say magsaba-saba. Di makiangayon nga ilang gipasa nato ang tanang uminto apan ilang gihakop ang mas dakong kita ug ginansiya ug ubang benepisyo karong nalaslasan na og katunga ang presyo sa lana.
***
Nabantang ang tinuorayng baraha sa gobyerno. Dihang nagsige pa og saka ang presyo sa lana, gawasnon ang mga negosyante sa pagpasaka sab sa ilang presyo. Giduphan pa sa gobyerno ang ilang lakang nga makiangayon kay nisaka sab ang gasto sa ilang produksiyon.
Apan karong nagsige na og tidlom ang presyo sa lana, wa nay ek ang gobyerno. Wa na maghisgot sa pagburot sa ginansiya sa mga negosyante ug sa paghikaw sa mga konsumidor sa makiangayon nilang katungod nga mahatagan sa mas baratong presyo. Nganong paspas kaayong gobyerno nga motabang sa mga negosyante apan labihang luyaha nga molingi sa interes sa mga pasahero ug mga konsumidor?
***
Tan-awa ra gung Land Transportation Franchising and Regulatory Board. Nagpa-goryo-goryo sa pagtibugsok sa presyo sa lana ngadto sa ang-ang nga dul-an sa katunga na lang sa labing taas nga presyo niadtong Hunyo ning tuiga.
Nagkinahanglan sila og petisyon gikan ni Kongresista Manny Iway una nakakita sa panginahanglan pagsubli sa plitehan sa public utility jeepneys. Nagkinahanglan sab og laing duha ka petisyon ni Iway una nisaad pagsubli sa plitehan sa buses ug taxis. Apan mamakasyon una sila sa Pasko ug liwas na sa bag-ong tuig silang mobalik sa trabaho. Gimandoan pang mga pasahero pagkumbinser nila nganong laslasan ang plitehan. Kon tua kapusta ang gobyerno sa transport operators ug mga negosyante, kinsa na man lay manalipod sa interes natong mga pasahero ug mga konsumidor?
- Latest
