Aboitiz mobutang og Automated Weather Stations

CEBU, Philippines - Tinguha sa Weather Philippines Foundation (WPF) nga mo-istalar og 1,000 ka Automated Weather Stations sa tibuok nasud diin kapin sa 20 ka yunit ang operational na sa probinsya sa Sugbo.

Ang ekipo adunay kapabilidad sa pagsukod sa temperatura, gikusgon sa hangin, pressure, humidity, solar radiation, ug ulan sa dapit nga nahimutangan niini.

Sa pagkakaron, aduna na’y 661 ka AWS nga gi-istalar sa lainlaing dapit sa nasud samtang padayon gihapon ang pagpahigayun og mga training sa mga opisyal sa lokal nga pangagamhanan alang sa paggamit niini.

Sa Sugbo, ang mga AWS nahimutang sa mga dakbayan sa Sugbo, Toledo, Talisay, Naga, Lapu-Lapu, Mandaue, Bogo ug Danao ug sa mga lungsod sa Malabuyoc, Dumanjug, Santander, Alcoy, Tuburan, San Remigio, Balamban ug Daanbantayan.

Laing mga yunit usab ang gibutang sa Mactan-Cebu International Airport, Cebeco I ug II, SM City-Cebu ug Consolacion, ug Cemex sa Naga.

Matud ni WPF General Manager Celso C. Caballero nga ang maong teknolohiya makatabang sa paghatag og impormasyon sa komunidad sa panahon sa kalamidad sama sa bagyo ug paglikay sa risgo.

Ang WPF usa ka corporate social responsibility initiative sa Aboitiz Group, sa pakig-alayon sa UnionBank, ug ang MeteoGroup, usa ka pribado nga weather information organization. (BANAT NEWS)