EDITORYAL – Kampanya batok drugas

Gipaspasan karon sa kapolisan ang paglutos sa mga tawo nga nalambigit sa pagpamaligya og gidili’ng matang sa drugas. Sagunson na ang ilang kalampusan, ilabi na ang mga sakop sa Regional Intelligence Division (RID) ug Regional Special Operations Group (RSOG).

Ang labing dako nila nga kalampusan mao kadto’ng pagkasikop sa gidudahan nga druglord didto sa Isla sa Cabul-an, sakop sa Buenavista, Bohol sa miagi’ng semana nga misakmit og kapin sa kilo nga shabu nga kantidad og P11.8 milyones. Sa laing anti-drugs operation napatay usab sa mga sakop sa RID ug RSOG ang usa ka giingong drug pusher sa Malabuyoc.

Samtang paspas ang gihimo’ng kampanya sa kapolisan, pabilin nga wala mohimo’g lakang ang mga sakop sa Philippine Drug Enforcement Agency (PDEA) nga unta sila man maoy gitugyanan sa paghimo’g hugtanay nga kampanya batok sa problema sa ilegal nga drugas. Sigurado nga wala malilong sa mga sakop sa PDEA kun kinsa ang mga tawo nga nalambigit sa pagnegosyo og shabu dinhi sa Central Visayas, ilabi na sa Sugbo, apan nagpabilin sila nga nagpakahilom ug kadudahan na kaayo nga giprotehean nila ang mga druglord.

Ang kaaktibo sa mga sakop sa RID ug RSOG sa paghimo’g kampanya batok sa mga tawo nga tigpayuhot og gidili’ng drugas angay nga dayegon sa kadagkoan sa kapolisan, samtang ang pagyugpos lang sa mga sakop sa PDEA sa ilang gitahas nga trabaho angay’ng aksiyonan na sa Malacañang.

Maayo na lang kay panagsa moapil ‘sab ang National Bureau of Investigation (NBI) sa paghimo’g kampanya batok sa drugas.

Hinuon, lisod pa gayud nga masumpo ang pagpamaligya og shabu sa mga “street pushers” apan maayo na lang nga giuna sa kapolisan ang mga dagko’ng tigbaligya og shabu.