Ayuhon ang pagpalawom

Kun ang atong kasapaan ayuhon lang g'yud sa pagpalawom sa atong mga opisyal sa kagamhanan, unya dungan nga habwaan sa mga lapok ang drainage systems, sigurado ko nga masulbad ra ang pagbaha.

Gawas nga palawman ang kasapaan, kinahanglan nga ibalik ang naandan nga gidak-on sa sapa. Kun himuon kini sa atong mga opisyal ug dili nila usik-usikan ang kuwarta sa kagamhanan, menus na lang ang problema nato sa baha.

Aw hinuon, kun maatol nga taub ang dagat sa pagbunok sa kusog nga uwan, hayan nga ang baha dili direkta nga mahipunta sa dagat. Apan arang-arang na lang kay karong panahona, bisan og hunas ang dagat masinati gihapon nato ang paglunop.

Dili man gud ko makontento sa sulti lang sa mga opisyal mao nga mihimo g'yud ko og kinaugalingon nga pakisusi.

Nasakpan nako nga kanang sapa nga molagbas sa dalan Sikatuna dapit sa eskena Bonifacio dili na makasugakod pagsangga sa tubig gikan sa Barangay Day-as kay hapit na lang nahimo'ng kanal.

Ang kahakog sa mga tawo nga nagpuyo daplin niini'ng maong sapa nga mipalapad sa ilang balay ug building ngadto sa sapa maoy nakaingon nga ang lapad nga sapa nahimo na lang nga maguwang sa kanal.

Daplin sa dalan Sikatuna, makita ang barandilya sa taytayan ug nakita pa ang marka "1920" nga sa ato pa, nahimo ang mao nga taytayan 94 ka tuig na ang milabay.

Makita nga ang ubang building ug kabalayan miabot na gani sa tunga-tunga nga bahin sa taytayan. Pagkatikasan g'yud tawon niining mga tawhana. Nagsalig ra sila nga kun maglunop diha sa eskena Bonifacio ug Sikatuna, dili man sila maapektahan.

Angay gayud nga mangisog si Mayor Michael Rama ug ipabungkag niya kining maong mga estraktura nga milapas na sa sapa. Dili angay'ng mahadlok ang mayor kay samtang masuko kaniya kining mao nga mga tawo, mas daghan ang mopagakpak sa kalipay.

Kining sapa nga milagbas sa dalan Sikatuna lumbay sa dalan Bonifacio, mosanggab unta kini sa tubig nga gikan sa Barangay Day-as paingon sa sapa sa T. Padilla apan kay mabaw ug gamay na man kining maong sapa, ang tubig direkta na nga maawas sa karsada ug makapalunop sa eskena Bonifacio ug Sikatuna.

Mayor Rama angay gayud nga anam-anamon nato pagsulbad kining maong problema sa baha dinhi sa dakbayan. Kanang paglunop diha sa dalan D. Jakosalem nga ang tubig gikan sa Barangay Kamagayan mahimo nga anha paagion sa maong sapa kun kini mapalawman.