Ang maadik sa druga

Kun magpareseta sa doktor, ibutang niini ang‘dosage’ kun kapila ug unsang orasa tumaron. Kini gumikan kay aduna kini lain nga epekto kun ma-overdose, ilabi na anang mga antibiotics, painkillers, anaesthetic ug uban pang delikado nga tambal, nga imbis mamaayo mosangpot na hinuon sa laing problema.

Wala’y kalainan kini sa maadik sa druga kay sama ra usab kini sa na-overdose sa tambal nga druga. Sagad nga ampay kaayo sa gusto magbisyo sa druga, kanang shabu o marijuana. Tungod kay nindot o hayahay kuno ang lawas nga mogaan o makapawagtang sa kasakit o problema. Mora kuno og naglutaw nga wala nay kahimatngon sa mahimo nga dautang epekto.

May pipila ka adik nga atong na-interbyu nga mga estambay, may trabaho, bata, hamtong ug tiguwang, lainlain ang ilang katarungan ngano naadik sila.

* Biktima sa dautang barkada, aron adunay kasumbongan o kaabag sa mga problema tungod sa panimalay nga wala’y pagsinabtanay.

* Para pagwagtang sa kakapoy, kalaay, kaaburido o kasamok sa kinabuhi.

* Aron kursonada sa mga butang o gustong buhaton.

Akong namatikdan nga way usa nga nakahibalo mahitungod sa maidulot nga kadaut sa kahimsog sa panglawas. Basta na lang ila ni gibuhat tungod kuno sa pagsulbad sa gituohan nilang problema. Sa ato pa, ang kakulang sa higpit nga pagmatuto o tugob sa pagminahalay, paghulma og positibong panglantaw. Makatabang unta sa paglig-on nga magkatinabangay sa paglambo sa kinabuhi. Ang maadik sa druga, grabe gyud ang kadaut sa pangutok. Busa i-edukar gyud kini nga wala’y mabiktima sa abuso sa druga.