Giusap ni Anselmo mangtas

Matag Domingo kanang mahubog si Marko magpabuto dayon siya sa iyang pistola. Unya huma’g pabuto magsinggit-singgit dayon kini nga manghagit  og  pinusilay. Ingon gyud niini si Marko basta mahubog mokuha dayon sa iyang armas de fuego ug magsige’g pabuto. Ang iyang mga silingan nga sila si Anton-Magda, Siloy-Tanciang, Belin-Anoy, Kardo-Nita ug uban pa nakahukom nga ila na lang petisyonan kining tawhana kay peligro kaayo.

Apan mitambag si Claudio nga konsehal dinhi sa ilang baryo nga dili na lang nila tandugon si Marko kay samok na. Kadaghan na ra ba kana siya kapusil ug nagsalig lagi kay batabata sa mayor sa lungsod.

Dihay kausa nagpabuto gihapon ang kanahan ug maoy naigo sa saa’g nga mga  bala ang kanding bukang ni Siloy-Tanciang ug gibuhat sa magtiayon ila na lang gitiwasan ug gikaldiritas, magpabayad unta silang Marko apan nahadlok sila.

Unya nianang pagka-gabii, mihapit si Marko sa tindahan ni Inse Emit aron moinom og beer. Wala hatagi ni Insi Emit kay basin og magpabuto na sab unya inig kahubog.

Apan nasuko ug gitamparos ang tiguwang, miabot ang apo nga dalaga nga si Julia nga milaban, apan giapil pud og tamparos. Ang apo ug apohan diha ra mangaluko sa may pultahan sa tindahan.

“Grabeha sad nimo, uy, Bay Marko, ka wa gud nimo’y kaluoy, mga babaye imong gitamparos, nagsalig ka tingali, no, nga duna kay pistola,” ni Anselmo nga aguador og tubig dinhi sa balangay ug maoy tighatod og tubig nilang Inse Emik.

Kini si Anselmo, apo sa gibantog ug gidungogdungog nga ungo dinhi kaniadto sa ilang baryo nga si Ingko Durong. Apan dugay na kadto.

“Unsa man, isog ka?” milanit dayon sa iyang pistola si Marko ug gipusil dayon si Anselmo.

Hurot gyud tanang bala, apan nahasiga ang mga mata ni Marko kay igo man lang nga nanglubong sa lawas ni Anselmo ang mga bala sa iyang pistola.

Unya gipanguha ni Anselmo ang mga bala nga nanglubong sa iyang lawas ug gikaon, giusap. Mingislo ang nawong ni Marko nga wa makatuo sa iyang nasaksihan. Unya miatras si Marko.

“O, atras ka man, ayaw’g atras,” ni Anselmo pa nga mihinayhinay og duol kang Marko.

“Ikaw ang isunod ko’g usap.”

Mihamag si Marko apan kalit siyang gitursi ni Anselmo ug gibali ang iyang tuong bukton. “Ayaaaayyyy!!! haaaaaa!!” nakasinggit si Marko sa kasakit. Unya miluhod siya sa atubangan ni Anselmo ug nangayo’g pasaylo, nagpakiluoy. Apan milubong na ang tag-as nga kuko ni Anselmo sa liog ni Marko. (Kataposan)