SWU, UV mag-usab karon

CEBU, Philippines – Human sa usa ka semana nga pahuway, mobalik na sab karong adlawa ang mga duwa sa 14th Cebu Schools Athletic Foundation Inc. (CESAFI) basketball tournament diin suwayan sa Southwestern University (SWU) Cobras nga modaog pag-usab batok sa defending champion University of the Visayas (UV) Green Lancers sa main game sa alas-5:30 sa hapon diha sa Cebu Coliseum.

Sa laing duwa sa seniors division,  ang University of San Carlos (USC)  Warriors makigsangka  sa University of San Jose- Recoletos (USJ-R) Jaguars sa alas-4:30 sa hapon.

Ang SWU milubong sa UV, 71-58 niadtong Agosto 14 sa first round sa elimination.

Bisan pa niini,  si coach Raul ‘Yayoy’ Alcoseba dili gihapon mokompiyansa karong gabii tungod kay wala pa siya malimot sa ilang gidangatan sa best-of-five finals sa miaging tuig diin nag-una sila sa 2-0, apan gisagunsonan sila sa Lancers og tulo ka duwa aron langkaton ang ilang ika-10 nga titulo sa CESAFI.

Sa laing bahin, suwayan sab sa USC nga segundaan ang ilang 74-70 nga kadaugan batok sa USJ-R sa first round niadtong Agosto  21.

Sa higayon nga mapilde ang Cobras sa Lancers, ang Warriors maoy moabante sa unang puwesto.

Sa samang paagi, importante sab kaayo ang maong duwa alang sa Jaguars tungod kay sa higayon nga ilang ma-upset ang Warriors, segurado na silang moabante sa semifinals isip No. 4.

Usa sa angayan atngan karong gabii mao ang import match-up nilang Landry Sanjo ug Bendley Valdor sa Cobras batok nilang Jean Marie Mpouma ug Jeff Aguara sa Lancers..

Atol sa first round, ang tandem nilang Sanjo ug Valdor maoy midominar ug maoy tuyo karon sa Lancers nga  sila na sab si Mpouma ug Aguara ang mosalida.

Sa secondary matches, ang USC Baby Warriors makigsangka sa USJ-R Baby Jaguars sa ala-1 sa hapon, sundan sa duwa tali sa  Cebu Institute of Technology-University (CIT-U) Wildkittens ug University of Southern Philippines Foundation (USPF) Baby Panthers sa alas-2:30 sa hapon. (BANAT NEWS)